Ka seiñ kiwa sikai wa tip kam ka Meghalaya Upper Primary School Teachers Association (MUPSTA) ha ka yalang ka Central Executive Committee ka seiñ kawa da pynman ha ka 10 tarik uni u bnai ha Mawkhar Christian Hr. Sec. School, Mawkhar, Shillong da iwi i yumut da chim ya ka rai wow pteiñ biang ya ka yakhih deiwa chong kyllaiñ myngngor ha ka 25 tarik uni u bnai.
Ya ini da rai wow leh ha waroh kawi ka Meghalaya nadooh i por 11:00 waje i step hadooh 3:00 waje noh chariñ ka sngi.
Da rai leh wa ini i chong kyllaiñ myngngor u pynman bait ha man ki nongbah ki District ka jylla wei yei thaw pynman daw pynbait da ki unit waphær waphær.
Kani ka yakhih man ko kam chibynta wow pynbor ya ka sorkar wow pynkrehkaam ya iwa da dawa ka seiñ itæ toh wow pynku noh cha ka Deficit ya waroh ki 844 tylli ki Adhoc Upper Primary School kiwa em ha ka jylla waroh kawi.
Kamtæ ka seiñ da kyrpaad ko ya waroh ki Unit waphær waphær wow chimkhia wei wow pynman ya kani ka yakhih deiwa chimbynta lang ryntih da waroh kiwa sikai khnang wa ini i thmu wa i angnood yong waroh kiwa sikai daw man ko iwa jop.
Ka wyrta na u E.G. War Organising Cum Publicity Secretary MUPSTA Central Body.
