Ka seiñ kiwa khayi ha ri-loom Jaiñtia, ka Jaiñtia Tribal Trader Association (JTTA) da pyrchah joor ko yei em ka khubor wa da mih wa ye u wan ka VISHAL ha chnong Jowai kawa man ka jait dukan wa heh kawa dai ya ki jait mar wa boon jait kamjooh lada wan kiwi wa kam kini ki jait dukan hapoh ka chnong Jowai daw pyrchah bait.
Ka seiñ na ki por cha ki por da jooh kyrpaad ko ya ka District Council wei kamjooh ki dorbar chnong wa em ki thaw wa man yaw wow ya krehlang dei wym toh u e Trading License lane ki NOC ya kiwi ki jaitbru (Non-Tribal) lane ki Company kiwa na baar.
Ka seiñ da dep ko leh wow yachem wa ka Synjuk ki Waheh Chnong ka Jowai yow paan yei ya krehlang heiyatoh wa i e NOC ya ki baar jylla lane ki Company na baar khamtam kiwa dai ya ki mar wa ki tre chnong ye ki wow dai.
Tangwa ka JTTA da sñiawsih ko wow tip wa ki Dobar Chnong ym bna ki yeini i kyrpaad hadooh ya ka rai wa da chim ha ka yalang wa da pynman ha ka 06-11-21 neibynta ini i jooh i kaam.
Kamtæ ka JTTA da khut ko ya waroh kiwa khayi hapoh ka ri Jaiñtia khamtam ha chnong Jowai wow yatylli da iwi i sur wa da toh i por wow mih chakhmat neibhah i por wow kyrpaad da kut i wei daw khut noh da ka General Meeting chisien ka sngi ya waroh kiwa khayi wan man kam ki tre chnong yow chim ya ka rai wa eh.
Puræ leh: Rai ka Synjuk Waheh Chnong Jowai wym toh u e klumar ya ki NOC cha kiwa na baar
