Naka Congress, cha ka AITC kattæ cha ka NPP psiah u MDC ka Boldamgre wym hun ya u Mukul  

Ka National People’s Party kawa yahkhmat ya ka sorkar ha ka jylla da nang khlan ko katwa dang mih ki sngi na i wan psiah yong boon ngut kiwa yahkhmat ka saiñpyrthai, wei ynne ka sngi leh u MDC ka GHADC na Boldamgre, u Steve M Marak deilang wa kiwa kyrchaan da lai psiah ki cha ka NPP ha ka yalang pdiang sñiawbha da u President rangbah u Conrad K Sangma, u Prestone Tynsong wa u Sniawbhalang Dhar najrong kiwi kiwa yahkhmat kiwa da emlang ha yung krehkaam ka Party ha nongbah Shillong.

U Steve M Marak uwa man u MDC uwa da jop na ka Party Congress wei uwa yajan bha wa uwa yahkhmat ka Liang Pyrchah, u Dr. Mukul Sangma wa ka Boldamgre MDC Constituency kawa em hapoh ka Ampati, da mih noh u na ka Congress wow psiah cha ka All India Trinamool Congress ha ki kajiak bnai wa da dep, tangwa ynne ka sngi ryngkat wa kiwa kyrchaan da pynyabi pura ki cha ka NPP.

Hawa klam wa ki laad pathai khubor, u Conrad da pyntip u wa ka Party pdiang sñiawbha wei e khublei ko ya u Steve Marak wa kiwa kyrchaan kiwa da rai wow em wa ka NPP, wei pynsñiaw u wa ini i psiah yong kiwa yahkhmat saiñpyrthai na kylleiñ ka jylla cha ka Party daw pteiñ i ha ki sngi wow wan. Da ong u wa ini toh i sdang wa kiwa mihkhmat paidbah daw psiah ki cha ka Party.

Da pyntip u wa i daw wa u Marak da mih noh u naka AITC toh neidaw wa ya ki rai wa da chim toh khlem da tiplang, da pyntip u leh wa kini toh kiwa yahkhmat kiwa da kyrchaan ya u Dr. Mukul Sangma da boon snem tangwa u Dr. Mukul da ieh noh u leh yaka Ampati wow lai cha Songsak iwa da pynsñiawsih ya kiwa kyrchaan. Chooh chooh da ong u sa iwi i daw toh hachwa wow psiah cha ka AITC toh wym em i ya pynbait lang wa kiwa yahkhmat tangwa da leh du da u Dr. Mukul.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U Conrad da ong u leh wa u Marak da pynsñiaw u leh wa ka NPP toh ka Party kawa da ku smatbha ha ka jylla, wei sñiaw u man iwa toh wow ya krehlang neibynta i myntoi ki paidbah hapoh ka Constituency.

Da ong u wa i wan yong u Marak toh iwa emkaam wei daw yarap chiboon ya ka Party, neibhah wa man u uwi na kiwa yahkhmat wa paaw ha Ampati, wei da pynrap u wa i mih yong u Marak na ka AITC pynyoo wa em iyi iyi hapoh ka Party wei kiwi kiwa yahkhmat leh da yaklam ki wow psiah noh cha ka NPP.

Uwa yahhmat ka NPP da ong u wa ka Party ym em kam ko wa da ku, tangwa da yoh yei chaniah na ki paidbah neibhah ki da yoo ki ya ki kaam yong ka sorkar wei ki sñiaw ki wa man iwa bha wow kyrchaan ya ka NPP.

Hawa kylli, u Conrad da ong u wa ka Ampati man ko kawa emkaam bha neibynta ka Party, neibhah ka NPP ym em ko uwi leh u MLA na ki 4 tylli ki Constituency ha South West Garo Hills. Da ong wa ka ka Party ka kreh chitom ko wow jop kattu katni na SWGH, heiwa da pynsñiaw leh yei kyrmen wa dei psiah kiwa mihkhmat kiwa da paaw daw ye wow leh rap bha wei wow jop na katai ka District.