U Montri Rangbah ka Meghalaya, u Conrad K Sangma ynnin ka sngi da wai u ya ka GNM Nursing School ha Nongstoin deiwa em u MLA ka Nongstoin, u Macmillan Byrsat wa ki heh ka District kamjooh naka chnat i chait i khiah.
Neiliang u Conrad da e yaroh u ya ka chnat i chait i khiah kawa da ye wow pyndep ya kani ka GNM School of Nursing kawa daw yarap bha ya ka jylla khamtam wa da yoo yei emkaam bru wakreh ha kini ki ar snem kiwa da lai wa em ka khlam.
Da pyntip u leh wa ki GNM Nursing Schools daw sdang leh ha Nongpoh, East Garo Hills wa ha South Garo Hills yow pyndap yeiwa duna bru wakreh ha ki kaam wa yatoh wa i sumaar sukhær. “Ka sorkar da yaleh ko wow pyntikna wa waroh ki 600 tylli ki thaw sumaar wa em ha kylleiñ ka jylla u ye ki wow e yei chakri hanla ki bru leh man ki kiwa duna,”da ong u Conrad.
Da khana u leh chaphang ka Medical Skill Centre ka kreh (Project) wa chongdor T. 280 klur da yoh yei mynjur naka Ministry of Minority Affairs, ka sorkar India wei daw booh ka hapoh ka jylla.
“Da yoo leh yei ku kiwa thap pyrtuid hapoh ka MHIS, i booh ya 485 tylli ki Wellness & Health Centers wa kiwi de ki kreh hapoh ka chnat i chait i khiah iwa da pynyoo wa ka sorkar da pynlut bor bha ko neibynta i chait i khiah,” da ong chooh chooh u Conrad.
U Montri Rangbah da pynsñiaw u leh yei sñiawkhia yei boon wa yap ki manbei hawa kha khon kamjooh ki khonboo wa dang kha wei da kyntu u ya waroh kiwa emkti lang wow chimkhia ya ini i kaam. Da pynchlur u leh ya kiwa wan puræ kam ki Nurse wow man kiwa kreh chitom hei kaam yong ki wei wow chongchit mynsien u kreh manda man ki kam ki Nurse deiwa man leh kiwa jem mynsien wei kiwa smat wow yarap.
