U President ka Khun Hynniewtrep National Awakening Movement (KHNAM) uwa man leh u MLA ka North Shillong, u Adelbert Nongrum da ong u wa da toh i por wa ka Jaiñtia Hills Autonomous District Council (JHADC) waka Khasi Hills Autonomous District Council (KKHADC) u khyrngiat noh ki wow pynbait thymme noh ya ka Rule 128 yong ka Assam and Meghalaya Autonomous District (Constitution of District Council) Rules, 1951.
Da ong u wa heipor wa man u kam u MDC ha KHADC, da klam u neipor cheipor wei da jooh kyntu u leh ya ka Executive Committee ha kitu ki por wow wanrah noh yei pynkylla ya ka AD Rules 128 neibhah iwa jia ha Garo Hills Autonomous District Council (GHADC) ye i wow pynkhyrngiat noh ya kiwa boon neibhah chong ha kti ki MDC wow chna aiñ lyngba ka Section 3 yong ka Sixth Schedule.
U Adelbert da ong u leh wa u yada ya ka pateiñ, neiliang yong oo neipor cheipor nadooh u snem 2009 wa 2014 heipor wa man u kam u MDC da ban u yeini i pynkylla ya ka AD Rules 128 neibhah kamwa jia ha GHADC kiwa man MDC wan ki na kiwi ki jaitbru.
Heijooh i por da ong u wa kam ka JHADC wa ka KHADC da toh wow syndong ki hajrong ini, deiwa pynsñiaw leh yei wym yahaap u pynkylla ya ka Sixth Schedule du nei em chiboon ki MDC namo wow pynyoh chiboon ka poisa.
Chooh chooh da ong u wa ki District Council toh u pynkhlan ki yei hok mantre wei ka AD Rules 128 toh kawa emkaam bha wow pynbait wei pynthymme noh ya ka khnang wow myntoi ki tre ri.
