Hadien wa da rap khooid wei rap suk u riñ mynsien ki bru wa lai wa wan na Iawmusiang deiwa kit noh yei jhep wa da sah da boon sngi ynnin ka sngi, i yukylli wa da mih toh cheiwon lai noh ya ini i jhep neibhah wa dang em bait i pyrchah yei noh jhep ha Moochutsdai.
Yoosar ini i jhep toh kiwa da ieh hapoh ki Truck ka Jowai Municipal Board (JMB) kiwa da em san tylli kiwa da pynyieñ hajan ka Petrol Pump chwa wow psiah cha Jowai ha u sarok Shillong-Jowai.
Kini ki Truck toh kiwa da dap dei jhep kiwa da dep tymmoh, tangwa i sma wa mih na ki ymtoh de iwa ke wei ki yung wa em chajan ini i thaw leh toh kiwa da boon katni.
I jhep iwa da kit ynnin najan ka yung krehkaam u DC, Jowai; ynne won da lang biang i kamjooh leh hajan ka Thomas Jones Synod College.
Hawa pyrchang wow kylli nadooh ki bor District kamjooh leh ki heh ka JMB hajrong ini i kaam ym em wa bien u ong iyi iyi wei kam kiwa chong chnong da sah hei doom wa iyi da leh wei kammon da pyrchang u pynbait yeini i kaam iwa ini wadep da ong wa da lai bait tangwa kat u yoo du hadien kattu katni por da poi biang chei jooh.
I jhep cha yung ki bru leh toh kiwa dang sah khlem pynkit da slem.
Pure leh: Da sdang kit yei jhep, paan por ka JMB hadooh ka 6 tarik wow pynkhooid lut
