Haka yalang wada pynman daki 36 tylli ki chnong ki Pnar wa em ka thaaiñ Block-I haka 19 tarik uni u bnai ha chnong Moolber, ki paidbah wa wan chimbynta da pynsñiaw ki yei sñiawkhia heiyatoh wa i eh i khoo wa da maad ki da ki phaw snem.
Ki paidbah wa e yei klam ong ki wym jooh em yoh ki iwon iwon i yarap næ i roi i paar naka sorkar wa kynthup nadooh ki skur, ka umbaam umdih, ka bordiñ khamtam u sarok uwa man u boodloom ka imlang sahlang.
“Hawa kjut chitom, khamtam yaki manbei wa punkhon wa hap yabeh lai booh chadooh cha Civil Hospital ha Ialong, da chem chitom wym em sarok wa biang,” da ong u Philip Talang uwa naka chnong Lamarang.
“Sa iwi leh i da chah lehbeiñ chah pyndik i ha ka sorkar Assam lyngba ki pulit, lyngba ka chnat Forest yong ka, kamjooh ha kiwa kieñ tiar ka Karbi,” ong u R. Tamaha naka chnong Deinler.
Kamtæ da kyrpaad joor ki yaka sorkar MDA wa katni hapoh i yahkhmat u Conrad Sangma wow kyruiñ khmat cha ki neibynta u pynyoh ki kaam pynroi yow pynsuk yei lai i wan ki paidbah ka thaaiñ, wei kamjooh leh yow yoh im suk kamwa man kiwi ki para Pnar.
Da pynsñiaw haroh ki hajrong i wiar noh i em Dolloi ka “Labang Nangpyllut” neibhah boon na kini ki chnong toh kiwa haap hapoh u pood u ang ka Labang Nangpyllut Dolloiship.
Yaka yalang ha kani ka sngi da pynlai da u Waheh Chnong ka Mowlaiñ u Mitton Sungoh deilang wa u Nilanki Sten, Secretary Chnong Mowjem kam u Secretary yong kani ka yalang.
Da yoh leh i klam na u Henry Tyngkan, na u Coming Dkhar naka Daailang Suchiang wa kiwi.
