Ki khynroo, ki waheh chirup wa ki muktiar na Ri-loom Jaiñtia ha ka yalang wa man ynne ka sngi ha Jowai da rai ki wow sdang noh da ka Jaiñtia Coordination Committee for Reservation Policy (JCCRP).
Kiwa kitkaam kani ka Committee man ki kamni hawah:
Chairman- Jersom Shylla
Vice Chairman- Treiborlang Suchen
Secretary- Sambormi Lyngdoh
Joint Secretary- Roitre Dkhar wa u O.L. Tariang
Ya kani ka Committee da chna kyrpang wow dawa naka sorkar jylla wow pynkylla noh ya ka State Reservation Policy ka jylla Meghalaya neibynta i myntoi ki khynroo khyllood ka jylla.
Hadien wa phyllu yumut bha, ka JCCRP da rai ko wow phah noh daka dorkhat cha u Montri Rangbah ka jylla, u Conrad K Sangma wow e yumut wei wow dawa noh na ka sorkar jylla wow pynkylla noh ya ka Reservation Policy ka jylla cha ka 90% (Open for all Competition) iwa mut i bhah neibynta ki Khasi, Jaiñtia & Garo katwa ka 10% ya kiwi won ki jaitbru neibhah katkam wa man katni ka bhah man ko 40% ya ki Khasi wa Jaiñtia wa 40% ya ki Garo katwa 20% ya kiwi won.
Ka JCCRP da kyntu ko ya ka sorkar jylla wow pynkylla noh ya ka State Reservation Policy hajrong ka yurim wa kani ka Policy wa katni da khia chiliang ware ko heiwa ki Khasi wa Jaiñtia hap yaknieh ki ya ka bhah kawa du 40% katwa ki Garo won yoh ki ka bhah wa hadooh 40% wei kawa tam ka 20% ya kiwi ki jaitbru.
Da ong ko leh wa lada pait bha ya kani ka Policy wa da chna 50 snem nachwa dang em chiboon i duna wei i por da ih bha i wa ka sorkar jylla u pynkylla noh ko ya ka Reservation Policy.
