Ka seiñ Jaiñtia Youth Federation-East Jaiñtia Hills Circle ynne ka sngi da e dorkhat ko ha u Joint Director of School Education & Literacy, Jowai wow kyntu booh noh ya ka Government Higher Secondary School hapoh East Jaiñtia Hills District.
Ka seiñ da ong ko wa ka District man ko kawa dang thymme bha wei dang em chiboon i duna ha ka lada wyrchaw wa kiwi ki District ka jylla.
Ka seiñ da ong wa i puræ puthi toh u budloom ka jylla wei hapoh ka District ym em wot kawi wot leh ka skur sorkar ha ka kyrdan puræ Higher Secondary iwa da ktah joor bha ya ki khynnah hapoh yong ka.
Heijooh i por da ong ko wa em chiboon ki manyung kiwa ymye wow phah ya ki khon yong ki wow lai puræ cha Shillong wa kiwi ki District katwa kamtæ da dawa bha i por wow booh ya kawi ka skur sorkar Higher Secondary hapoh ka District.
Kamtæ neiliang ka seiñ da kyntu ko ya ka sorkar wow chimkhia ya ini i bynta neibynta i bha i miat ki paidbah ka District waroh kawi.
