Kam chibynta wow lehkmen ya ka Azadi Ka Amrit Mahotsav namo i mynsien lehkmen yoh laitlooid ka ri iwa da dap 75 snem wei wow pynkynmoo u myllien u im deiwa yada na u khñiang COVID-19, da wai ynnin ya ka Exhibition Cum Awareness Programme da u Prof. T B Subha, Acting VC, NEHU, Shillong deiwa emlang u Dr. Jay Narayan, Registrar, NEHU, Shillong, Dr. Engam Pame, Director, Regional Outreach Bureau, Shillong wa Dr. R. L. Nongkhlaw, Dean of Students’ Welfare, NEHU.
Ya ka yalang da pynman ha Multiuse Convention Hall, NEHU wa pynman da ka Regional Outreach Bureau, Ministry of Information and Broadcasting, ka sorkar India deiwa ya krehlang waka Dean Student’s Welfare, NEHU wa Research Scholars Forum, NEHU.
Hawa klam kam u kongsan, u Prof. T B Subha da ong u wa hanla da yoh yei laitlooid la 75 snem, i rukom pyrkhat wa i rukom im toh deiwa pynbood ya i rukom ki ri wa em cha sep sngi. Wei du deiwa yoh laitlooid i na kini ki jait u ye u ong wa da yoh laitlooid sakhiat i. U Prof. T B Subha da ong u leh wa emkaam wow pynkylla leh yei rukom e sikai deiwa e nongmuna wa ki skurbah kam ka Oxford wa Cambridge da leh ki chiboon hajrong ini i jooh. Da kdaw u leh ya ka Education Policy wa thymme ym em klam ko yei pynkylla yeiwa sikai ha ki thaw puræ, kamtæ da ong u wa emkaam wow pyrkhat deiwa phær kamjooh ha ki thaw puræ wa da heh kyrdan yei i rukom pynlai ya ki dei yong rim.
U Dr. Jay Narayan, Registrar, NEHU hawa e yei klam da pynkynmoo u wa ki skurbah kam ka Nalanda wa Taxila toh kiwa yahkhmat wow sdang ya i e sikai ha ki kyrdan wa heh wei dang pteiñ i hadooh katni. Heithaw wow pait i yei yong kiwi, toh u bood i yeiwa yahluti ki warim yow pynlai ya ka India cha ka mynried wa tyrchaaiñ, da ong chooh chooh u.
Kam chibynta kani ka sngi, da saam leh ya ki khusnaam cha kiwa jop ha ki yakob Patriotic Lori Writing Competition kawa da dep wow pynman chwa.
