Da: U Khroo L Pariat
“Iwa hachwa tam i toh ki tre ri tre muluk. Neitæ bood won sa kiwi tawan i rukom pyntipmit i rukom ngait…”
Manda kitæ kiwa em i kitkhlieh ha ka sorkar, ha ka JHADC, ha ka chnong ka thaw, katni won sa ha ki seiñ, ong u du nga donhi namo du ka seiñ yong nga wa ye u leh yeini, tangwa…? Ym toh neitæ da sdang u noh tai namo da booh chooh u ya i kaamram i yong O neibynta yow chngaaiñ kiwa chong chnong ha chnong Jwai wa ha ri Jaiñtia?
Katni kiwa chong chnong da stat ki, kamwa thrang ka Bei u Pa, u Ma, ka Bei Heh, Bei Lood yow lait na i chah pynbiej. Ka spah da em, da lait na u slap na ka la’er, i p’chem u khooid i, u jop samen ha ka yaleh, nga da biang wa ka yung O.
Tangwa, lada ka chnong ka thaw ym chngaaiñ de ko, da sma da tung ka um, ka la’er wa ki synrang ki chariñ, da taroi ki surok ki luti, ki moo da sdang u wiar, ki loom da chah pooh chah deiñ, u slap da kjut doh u manda hiar u cha khyndaw. Dang em yumut hi ma-ai itæ i yoh spah yoh lak, i biang tang ya nga samen wa ka yung tæ da biang? Lada ym chngaaiñ dæ, yi wow him i kitkhlieh yow chngaaiñ ka chnong ka dong?
Toh hi ka bor kawa ha khliehtam em ko ha uwi pa kawi kiwa chong chnong. Kiwa ye u him ya i kitkhlieh kam ka kaamram-tangwa yi won wa khang yow leh yeitæ?
Kamwa man kattæ ymtoh wa ka chnong Jwai ka ri Jaiñtia ka Meghalaya yong i da poi ko ha katæ ka kyrdan wa u pyrkhat noh i- iyi u leh i neibynta ka chnong Jwai ya ka ri Jaiñtia. Ym toh dæ, iyi u leh, u e ko neibynta i yong nga?
Kattæ manda chngaaiñ ka chnong Jwai chngaaiñ ka ri Jañtia. Ym toh em dor i yoh i em i yong i waroh. U ekti i deiwa chngaaiñ deiwa kmen ha ka pateiñ wa daw heh, ya i khih i kynchew wa ya kani ka Beirymaw. Kmen i manbru longbru i yong i manda tymmen. Kmenlang i waroh wa ka ri India yong i.
Aa! Blai kyrkhu kyrdoh ya i, ya ka ri India ka yong i.
