U President ka Ukraine, u Volodymyr Zelensky da pyntip u wa da dep u wow yaklam wa u President ka Belarus u Alexander Lukashenko ynne ka sngi wei da mynjur wow yachem wa kiwa mihkhmat na Russia khlem da booh kyndon ha khappood ka ri Ukraine wa Belarus hajan ka wah Pripyat.
U President ka Ukraine da pyntip u leh wa u Alexander Lukashenko da chim u leh yei kitkhlieh wow pyntikna wa ki tiar yalehthma wa da booh da ka Russia hapoh ka Belarus u neh ki ha khyndaw nadooh ki lieñsuiñ, ki Helicopter wa ki Missile ha i por wa lai yaklam, heipor wa yaklam wa heipor wa liwan.
Hachwa ini, u Zelensky ym bien u wow yaklam wa ka Russia hapoh ka ri Belarus neibhah wa da pynemkaam yei thaw yong ka wow hiar thma ya ka Ukraine.
Tangwa neiliang ka Russia waka Belarus ym pu em ong ki iyi iyi leh hajrong ini ya pynbait.
Ha iwi won i liang, u President ka Russia u Vladimir Putin da phah u ya u heh dooh ki chipai yong oo wow pynkhreh da ki tiar yaleh wow pyntieñ ya kiwi.
Ini da wan i hadien wa ki ri ka NATO da pynbna ki ya kiwa boon ki kyndon wow khang yei khayi pateiñ wa ki kaam poisa poilaiñ yong ka Russia iwa ong u Putin wa man ki pyrchah ya ka aiñ.
Kam chibynta wow pynkhor ya ka NATO u Putin da maham u wow pynemkaam da ki tiar wa ye u pyntieñ ya ki wei chwa wow hiar thma leh da maham u ya kiwon kiwon ki ri wa tuklar wa ini i kaam wa daw maad ki ya i wym jooh yoo hadooh katni.
Ini da pynsñiawthooh ya kiwa boon wa ye u mut wow pynemkaam da ki tiar yaleh thma wa tip kam ki Nuclear Weapon wei i phah pynkreh ye u mut wa yow smat u pynemkaam ki.
Ka Russia toh kawa em boon dooh ki tiar Nuclear kamjooh le ka NATO em ko chiboon kini ki jait tiar yaleh thma. Tangwa ini da yoosar toh wow pyntieñ ya ka NATO wow yarap ya ka Ukraine hadien wa ka NATO da pynkhreh ko wow phah ya ki chipai yong ka hanla ka Ukraine ym em man ko kam ka dkhot ka NATO.
