U Lahkmen Rymbui, uwa man u Montri wa pait ya ki Kaam Pohyung ha ka jylla da ong u wa ym pu yoh ya kawon kawon ka yutip wa em i ya krehkaam lang kiwa kieñ tiar yaleh wa kiwa khayi mooyong pyrchah ya ka aiñ, tangwa da ong u wa ha ki kaam pyrchah aiñ ym ye wow kyntait ya ki, neibhah boonsien kiwa leh pyrchah ya ka aiñ namo ki damok ki yakreh ki para ki hi.
Hawa kylli yei mih wa i lai i wan ki bru wa kieñ tiar ha ki thaw wa em i tih mooyong pyrchah ya ka aiñ, u Montri da ong u wa hadooh katni ki pulit ym pu yoh yutip ki dewa tikna tangwa da ong u leh wa lada em sakhiat kitæ ki kynhun kiwa leh ya ki kaam pyrchah aiñ, ki pulit daw leh bait ki deiwa eh.
Ha iwi i liang da ong u wa ka sorkar ka pyrchang ko katwa ye yow khanglaad ya ki kaam pyrchah aiñ, tangwa da pynrap u wa em chiboon i eh, iwi toh wym biang ki pulit neibhah ym pu ye wow pyndap ya ki spah tylli ki kaam pulit kiwa lait, ya kiwa dang pyndap kaam katni.
Da ong u wa du na ki kaam SI wa Constable da em hadooh 1800 tylli katni ki wym pu dap.
Chooh chooh da ong wa ym ye wow ong wa ki pulit u ye ki wow leh lut ya waroh kiyi kiyi katwa em, heiwa da yaroh u ya i kreh ki pulit deiwa ong wa ki da pyrchang ki wow pyndooh ya ki kaam pyrchah aiñ wei hawa yoh yutip da lai ki cha ki thaw wa pynbaad wa em i tih mooyong pyrchah aiñ.
