Kiwa sikai SSA na kylleiñ ka jylla hapoh i yahkhmat yong ka Meghalaya SSA Schools Association, Central Body. Ynne ka sngi da mih paidbah ki wow lai paidbah namo ka Rally kawa da sdang na thaw pynyieñ kari wa em ha Polo, Shillong yow lai cha Secretariat.
Kiwa sikai skur da pynsñiaw ki yei dawa wei da beiñ joor ki ya ka sorkar jylla wa ya ki Party kiwa em ha ka sorkar MDA hadien wym ye ki wow pynlait ya ka tulop yong ki 12,541 ngut kiwa sikai SSA kattu la 5 bnai.
Hadien wa kiwa sikai da lai Rally ki deiwa synran ki pulit, da sangeh noh ha MBOSE yow pynbna wa u Montri ka chnat puræ puthi, u Lahkmen Rymbui da khut u ya kiwa yahkhmat ka MSSASA wow yaklam hajrong kani ka kaam wei neiliang kiwa sikai da chrai ki yeini wa khut yaklam hawa khaddooh du hadien wa da pyrchang wow lai toor bait cha Secretariat wei da chah khang luti noh ki ha ki pulit wei ini da wanrah i yatim yamai hapyrdi kiwa sikai wa ki pulit.
Hadien wa joor i yania wa awri, neiliang ki bor District da pynsñiawthooh ki ya kiwa yahkhmat ka MSSASA wei da mynjur lang wow lai chong ha Madan Malki kat hadooh wa da yoh ya ka khubor iyi wa mih hapyrdi i yaklam wa u Lahkmen Rymbui.
