Ka Jaintia Career Coaching Centre (JCCC) daw e ko ya ka Free Coaching Class ya ki khynroo khyllood kiwa thooh kreh, thooh jaam deiwa yaleh Exam Exam MPSC wa DSC.
Neiliang ka JCCC da sñiaw ko yei eh wei angnood ki khynroo wa thooh kaam thooh jaam deiwa yaleh ya ki ‘Competitive Exam’ kamtæ ka JCCC da chim ko ya kani ka luti wow e da ka Free Coaching Class khnang wow ye u yahluti yow yoh sikai neibynta kini ki jait Exam waphær waphær.
Kamtæ ka Jaiñtia Career Coaching Centre daw pynman ko ya ka Entrance Test neibynta wow jied ya ki khynnah yow yoh ki u psiah cha kani ka Free Coaching Class. Ya ki Form neibynta kani ka Entrance Test ye wow yoh na ka Centre kawa em ha Moowamon, Mihmyntdu (mar pyrchah DTO, Jowai).
Ya ka Entrance Exam daw pynman ha ka 26-03-22 katwa ya ka Coaching Class daw sdang nadooh ka 04-04-22.
Ka JCCC da ong ko leh wa da yoo ya kiwa boon ki khynroo kiwa em i mon wow yakhun MPSC wa DSC Exam tangwa ym em Coaching Centre wow yarap ya ki hapoh ri-loom Jaiñtia wei toh na ini i daw wa duna bha kiwa ye u pyndep ya ka Competitive Exam.
Chooh chooh ka JCCC da kyntu kynpham ko ya ki khon khynroo wa thooh kreh wow kreh chitom bha ha iwon iwon i kaam khnang wow ye ki u poi cha ka thong yong ki.
Ya ka yutip wa bniah ye phi u yoh deiwa wan cha ka Coaching Centre lane deiwa Phone ha kini ki Number- 7640092181/8837292299.
