Ka General Secretary ka Meghalaya Pradesh Congress Committee (MPCC), ka Deborah C Marak da pynsñiaw ko yei wym sñiaw yahaap ya i klam u Montri ki kaam pohyung ka jylla heiwa da ong u wa i daw wymye wow khoom u kdoh ya ki kaam pyrchah aiñ wa mih na u mooyong toh neidaw wa duna ware ki pulit.
Ka Deborah da ong ko wa ini i klam u Lahkmen toh wa em kiwa yah bakla namo wa ymtip u yeiwa jia, deiwa ong leh wa wan ko na ki thaw wa boon u mooyong, tangwa hawa lai na ki sarokbah du hapoh 100 næ 200 meter da em ki kari pulit, wei da kylli ko, iyi leh ki pulit ha sarok wei yeiyi yada ki? Da ong ko leh wa lada ka sorkar phah ko ya ki pulit wow leh deiwa khor ya kiwa tyngkheiñ aiñ, ym mih i kyntien pyrchah aiñ na u Montri.
Hawa kylli, ka Deborah da ong ko wa iyi leh ki pulit ha sarok hawa u Montri ki kaam pohyung kam u wa duna ki pulit.
Hajrong i pynbaad ya ka wa em ko ki thaw khrong dan pyrchah aiñ, ka Deborah da ong ko wa ka sorkar toh u thung bait ko da ka takit wa laitlooid, hawa ka da ong ko wa ka sorkar ym yoh ko ya ka bui (Report) wa biang hajrong itai i pynbaad neibhah ki bor District ym e ki ya ka Report kawa sakhiat heiwa ki daw yaleh ki katwa ye wow yada ya ka sorkar.
Puræ leh: Para damok jooh ya krehlang hi ki, ong u Lahkmen
