Ka seiñ HYC ynne ka sngi da e dorkhat ko ha u Montri ka chnat C&RD hajrong ka Meghalaya Community & Rural Development Services wa ka Meghalaya Community Rural Engineering Services.
Ka seiñ da kdaw ko wa kamwa man katni em 46 tylli ki C&RD Block ha ka jylla wei lada pynkrehkaam ya kini ki kyndon namo ki Service Rules daw myntoi bha heipor wa thung kreh ya ki sahep BDO wa Engineer wa kynthup ya ki kyrdan Asst. Engineer wa Junior Engineer ha waroh ki Block.
Da ong ko wa kamwa man hi katni, ki BDO da thung da ki sahep MCS næ deiwa chim na kiwi ki chnat sorkar kam ka Agriculture, Veterinary wa kiwi kiwi. Ya ki Engineer da paan kylliang na ka PWD Department.
Ka HYC da ong ko wa katkam ka yutip, em ki Block ki wym em ya ki Engineer la da ki AEE næ JE wei i boonkaam ki sahep MCS kiwa chah thung kam ki BDO ha kiwi ki kreh da pynman ya ki paidbah wow chem chitom ki ha kiwa boon ki kaam hapoh ki Block.
Kamtæ ka seiñ da dawa ko wow pynkrehkaam noh ya kini ki Service Rules khnang wow myntoi ki khon khynroo khyllood wow yoh kreh neibhah ini daw wanrah i ya i lait kreh da ki spah tylli ha ka C&RD Department.
Hajrong ini, neiliang u Montri da pyntip u wa ka chnat da lai ko chaphrang wow chna ya ki Service Rules wei wow pynkreh smat noh ya ki.
