Ka Meghalaya daw hap ko wow leh chiboon hadien wa kut ka sngi wa ar ka yalehke ka Ranji Trophy pyrchah ya ka Gujarat deiwa yoh 99/6, iwa chah ieh da 456 Run hadien wa ka Gujarat da kamai ko 555/8.
Ynne i step ka Gujarat da pteiñ ko na iwa ieh ko ynnin iwa 303/3 ha Rajkot hapoh ka Elite Group A. Ka Gujarat da kamai ko sa 252 Run chwa wow pynkut. U Chirag Khurana (Guest Professional) da yoh u sa ar Wicket yow pynkut da 5/151 heiwa u Dippu Sangma (1/37) da yoh u pynhaap ya uwa kamai boon dooh ka Gujarat, u BH Merai (223) heiwa hadien ini ka Gujrat da rai ko wow pynkut noh yei kamai. U Kilco Marak (1/78) toh sa uwi wa yoh Wicket ya ka Meghalaya.
Ka Meghalaya da pynkylla ko yei rukom pynlai ya kiwa Bat ko deiwa phah chwa ya u Ravi Teja (Guest Professional) tangwa ym em mankaam i heiwa da kamai u du 8 Run donhi. U Bamanbha Shangpliang, da mih u haka yalehke wa nyngkong yong oo haka First-Class Cricket, wei oo leh da yoh u 8 Run hi deiwa mih yow Bat hei wa le.
Du uwi uwa Bat ka Meghalaya wa yoh palat 10 Run utæ toh u Punit Bisht (Guest Professional) uwa da kamai 54 Not Out na 77 bol wa kynthup ya 8 tylli ki 4 Run wa kawi ka 6 Run.
Ka Meghalaya da emkaam ko ya kiwa Bat cha tre wow lehbhah ki yow yoh lok u Bisht.
