Ynne ka sngi da wan wai yaka Community Hall wa thymme ka Sutnga Dong Pohshnong, da u Seiborlang Shadap, MDC ka Sutnga Narwan kawa da yarap chna u hapoh ka Scheme SAG 2020-2021.
Najrong ka poisa na ka Scheme SAG da e yarap leh ka dong T. 8 lak wow chna ya kani ka Community Hall.
Ha ini i wai ya ka Community Hall da pynlai yaka yalang da u Waheh Dong, u Huni Bareh wei da yoh yei klam da u General Secretary ka Dong, u Haoo Pala wei da pynbood sa i klam na u Hopeful Bamon, u MLA warim ka thaaiñ, na u Waheh Chnong ka Sutnga u Bankupar Sutnga, na u R.S. Lyngdoh MDC Sutnga Nongkhlieh wa na u Pastor D.H. Walang kamjooh na u Seiborlang Shadap uwa da man leh kam u kongsan.
Da pynphooh ya kani ka sngi da i rwai na ka seiñ manbei wei da yoh leh yei chaad na ki khon khynroo ka dong wei khaddooh da yoh yei ktien khublei na u C. Sutnga uwa man kam u dkhot yong ka dong wei da pynwai ya ka yalang da u Waheh Dong.
