Hadien wa wan ban ka khlam COVID-19 wei hanla ka sorkar lyngba ka chnat i chait i khiah da khut ko ya ki paidbah wow chim ya i tika yada COVID-19, tangwa kamwa da yoo hi wa da em ki wakreh ka chnat i chait i khiah ki wym chaniah wow chim yei tika wei kiwa boon na kini toh ki wakreh ha ki Hospital sorkar.
U Montri wa pait ya i chait i khiah hapoh ka jylla, u James PK Sangma hawa jubab hapoh ka Yung Dorbar da pyntip u wa katkam i thooh bniah da ka Indian Institute of Public Health (IIPH), Shillong da chem wa em hadooh 2505 ngut ki wakreh ha i kaam wa yatoh wa i chait i khiah ki wym bien yei tika yada COVID-19 iwa man kamwa 10% ki wym bien, wei na kini 2456 ngut toh ki wakreh ha ki Hospital sorkar, katwa 49 ngut toh ki wakreh ha ki Hospital ki bru samen.
Hawa wanrah ya ka bui (Report) wa pura ha ka kynta kylli wei jubab, u MLA ka AITC ha ka Liang Pyrchah, u Himalaya Muktan Shangpliang da ong u wa katkam i chem ka IIPH na ki 4 tylli ki Hospital, da em hadooh 93 ngut ki Doctor ha ki Hospital sorkar kiwa khlem chim yei tika, 462 ngut ki Nurse wa 437 ngut kiwi won ki wakreh ha ki Hospital sorkar kiwa khlem chim yei tika yada COVID-19. Katwa ha ki Hospital samen da em 43 ngut ki Doctor, 144 ngut ki Nurse wa 147 ngut kiwi won ki wakreh ki wym chim yei tika satia.
Katkam wa pyntip u James Sangma, da em boon tylli ki daw wa pynman ya ki wakreh ka chnat wow kyntait yei tika neidaw wa em wa yoo ki ha ki Social Media, wym em kiwa hayung hasem wa chim, em kiwa tieñ, em won kiwa ong wa ini i kjut ym toh iwa joor, em kiwa tieñ boi ya dooh khon wa kiwi kiwi heiwa neiliang ka sorkar da pyrchang ko wow yasyllok wa ki na i por cha i por wow pynsñiawthooh yei emkaam wow e tika.
Hawa jubab chooh chooh yeiwa kylli, u James da pyntip u wa ka yasyllok da yarap ko heiwa 70-80% na kitu ki wym bien u chim tika, katni da mynjur ki wow chim noh ya ini i tika.
Heiyatoh won wa waroh kiwa da yoh tika chisien hapoh ka jylla da pyntip u wa em ki 70.24% katwa kiwa da yoh tika la arsien da em ki 57%.
