U MLA ka NCP na Gambegre, u Saleng A. Sangma ynne ka sngi hapoh ka yung dorbar da ong u wa kiwa boon ki bru paidbah ym sñiawthooh ki kammon i rukom kheiñ bai bordiñ ka MeECL wei da em wa sñiaw wa da chah thok ki ha ki Linemen deiwa pynbaad wa kiwa boon ki Linemen da thoh da kheiñ hi-eh ki ya ki Bill yong ki cha luti syngkieñ kamtæ da emkaam wow pynche paidbah yei rukom kheiñ bai bordiñ yow lait nei chah thok.
Heiyatoh wa ini, neiliang u Montri ka chnat bordiñ, u Prestone Tynsong da ong u wa daw chimkhia ka sorkar yeini deiwa pyntip u wa da pynmih hukum wa ki wakreh wa em cha ki chnong ki thaw wa hap ki wow leh yei kaam yong ki katkam ka kyndon khamtam manda yachem yaklam wa ki paidbah wa pynemkaam bordiñ yow lait leh nei kheiñ bakla yei bai bordiñ.
U Saleng da ong u leh wa ki Linemen lada e poisa ya ki, smat ki wow pynduna ya ka bai bordiñ wei da em leh ki yung kiwa ym em tang u yoh bordiñ da poi bait ka bai bordiñ ha ka Constituency yong oo.
Heiyatoh won wa i ku syndet ka bai bordiñ, neiliang u Prestone da pyntip u wa da yoh ya ki ujor na ki por cha ki por nadooh ki thaw wa em cha sor wa cha palatsor, kamtæ da dep wow pynmih hukum cha waroh ki Field Officer, ki Sub-Divisional Officer yow pyntikna wa kiwa leh ya ka Meter Reading toh u bniah bha ki yow lait u kheiñ bakla neibhah em hi ki por wa bakla ki kam ki bru.
U Montri da e nongmuna u wa em ki por wa ku syndet ka bai bordiñ da ar chah na iwa jooh yoh wei ini i rukom ku toh iwa ym ye u man, kamtæ ka sorkar da pyntip ko cha ka MeECL wow booh da ka chnat wa kyrpang du wow pait ya iwa ujor paidbah wei wow pynbait smat ya ki ujor.
