U MLA ka Mawsynram, u HM Shangpliang da wanrah u ya ka Cut Motion ynne ka sngi hapoh ka dorbar mang tyngka hawa paan poisa chooh chooh (Supplementary Demand) ka sorkar kawa T. 5,50,12,222 kawa da booh bhah lang neibynta i lehkmen dap 50 snem ka jylla.
U Shangpliang da yaroh u ya ka lehkmen dap 50 snem ka jylla kawa da pynman ha u Duyatra haka 21 tarik uni u snem ha JN Stadium, Shillong kawa man kawa chongkun wei kawa yahaap sakhiat wa i dap 50 snem.
Kamtæ da ong u wa da sñiawthooh wa kani ka poisa wa dang paan man ko leh kam chibynta wow su ya ka Bill wei wow saam leh ya ka poisa cha kiwi ki District yow pteiñ ka lehkmen ha waroh uwi u snem.
Hajrong ini, da paan u yei pyrtuid ki Contractor, ki Event Manager wei kammon wa da jied ya ki, katwon da pynlut deiwa kylli leh kammon da chna ya ka Pandal hajrong ka madan kawa da em ya u Artificial Turf heiwa kani ka madan JN Stadium toh kawa emkaam wei kawa da pynlut poisa chiboon wei ileh ym em da jied da kiwi won ki thaw wow pynman ya kani ka lehkmen.
Hawa e yei jubab heithaw u Montri Rangbah ka jylla u wym em hapoh ka dorbar, neiliang u Symbood Montri Rangbah ka jylla, u Prestone Tynsong da ong u heiyatoh wa katwon da pynlut ha ka lehkmen wa da pynman ha Shillong ym pu tip neidaw wym pu yoh na ki bor District kamjooh leh hadooh ki pyrtuid ki Contractor kamjooh kiwa da embynta ha kiwa boon kiwi ki kaam.
Heiyatoh won wa i chna Pandal hajrong u phlang Artificial Turf kam chibynta ka lehkmen, u Prestone da pyntip wa da leh yeini deiwa yaklam chwa waka chnat Sports & Youth Affairs, ka IPR kamjooh waka DC ka Shillong deiwa khana leh wa da dep pynchna biang ya ini wei ki yalehke da ye biang ki u sdang.
U Shangpliang da mynjur u wow pyndam ya ka Cut Motion lada kular u Montri wow pyntip yeiwa dawa ha ka tayaw wow won yei lut hawa lehkmen dap 50 snem wa pynman ha Shillong kamjooh deilang wa i pyrtuid ki Contractor wa ki Event Manager wei kammon da jied ya ki.
Neiliang u Prestone da pyntip u wa daw yaleh ki katwa ye yow e yaka yutip wa emkaam u MLA.
Chooh chooh da pyntip u wa na ka T. 5,50,12,222 wa da paan, T. 3,50,12,222 toh neibynta ka tulop ki wakreh ha DC wa ha ki yung krehkaam ki SDO katwa ka 2 klur won toh neibynta ka lehkmen dap 50 snem da ki 12 tylli ki District ka jylla.
U Prestone da khana u leh ya ka bhah poisa neibynta ki District wa da phah cha jar jiar ki yung krehkaam ki DC man ki kamni ha wah:
DC Shillong- T. 7,27,00,000
DC Nongstoin- T. 2,51,60,000
DC Nongpoh- T. 2,64, 03,902
DC Jowai- T. 2,91, 53,926
DC Tura- T. 3,14,00,000
DC Williamnagar- T. 2,28, 59,608
DC Baghmara- T. 1,67,51,635
DC Resubelpara – T. 1,97,91,929
DC Khliehriat- T. 2,60,00,000
DC Mawkyrwat- T. 2,47,50,000
DC Ampati- T. 2,54,10,000
Cha ki yung krehkaam ki SDO:
Sohra Civil Sub-Division- T. 92,60,000
Mairang Civil Sub-Division- T. 1,47,97,473
Amlarem Civil Sub-Division- T. 1,02,22,147
Dadenggre Civil Sub-Division- T. 1,08,56,380
Pynursla Civil Sub-Division- T. 91,00,000
Chokpot Civil Dub-Division- T. 1,00,90,000
Raksamgre Civil Sub-Division- T. 89,00,000
Mawshynrut Civil Sub-Divison- T. 81,80,000
Ranikor Civil Sub-division- T. 28,90,000
Kamtæ deiwa kdaw ya ini da ong u wa da emkaam chooh u paan poisa.
