U MLA ka All India Trinamool Congress (AITC) uwa man leh uwa yahkhmat yong ka Liang Pyrchah hapoh ka yung dorbar chna aiñ ka jylla, u Dr. Mukul Sangma da ong u wa chisien wa da chim ya i rai wow poi noh chei yasuk, man iwa emkaam yei chaniah markylliang.
U Dr. Mukul da ong u ya ini hawa kylli hajrong i bien ka Hynniewtrep National Liberation Council (HNLC) wow wan noh cha i yasuk khlem booh kyndon wei neiliang ka sorkar da thung ko ya u ksiang wow pynbait ya ini i kaam, da u Peter S Dkhar, IAS (Retd).
Hawa klam ynne ka sngi, da ong u wa dadep yaklam u wa ka sorkar wow man ko kawa syndong bha wow lai chaphrang wa ini i kaam wei wow pyntikna wa kiwon kiwon kiwa ka sorkar da leh ko ym wanrah yei eh lane wow pynman ya ki dkhot ka seiñ wow artatien noh ki heiwa da pynrap u wa chisien wa da rai wow lai chakhmat wow klam yasuk, ym toh de wow artatien.
Chooh chooh da ong u wa chisien wa da chim ya i rai wow thung ya u ksiang neibynta wow klam yasuk wa kawon kawon ka seiñ, itæ mut i wa ka sorkar India lyngba ka Ministry of Home Affairs da mynjur lang ko neibhah ka sorkar jylla ymye ko wow leh yeini samen.
Da ong u wa i rai ka HNLC wow wan cha i klam yasuk toh i rai wa miat wa da chim da ka seiñ.
U Dr. Mukul uwa man leh u Montri Rangbah warim da ong u leh wa hadien u snem 2014 wa da soi ya ka soskular (Tripartite Agreement) hapyrdi ka sorkar India, ka sorkar jylla waka ANVC, da mih chiboon tylli ki seiñ kieñ suloi ha kitu ki por wa kynthup leh ya ka GNLA kawa da leh ya ki kaam damok. Da ong u wa ini i kaam toh iwa kyllaiñ bha katwa kamtæ ymtoh u kheiñstiñ næ wow leh iwon iwon i wow pyndooh mynsien ya ki khynroo.
