Ka Tura District Cricket Association da jop ko ya ka yalehke wa nyngkong yong ka ha ka Zone 2 ka U-23 Boys Inter District Cricket Tournament wa pynman da ka MCA deiwa jop ya ka North Garo Hills da 147 Run ha Mendipathar, North Garo Hills ynne ka sngi.
Katwa ha ka Group A ka Zone 1, ka Shillong Cricket Association (B) da jop ko ya ka All Jaintia Cricket Association da 216 Run ha Nongkhrah, Ri-Bhoi.
Ha Mendipathar, ka Tura da jop ko yaka kylla khlem wei da Bat nyngkong ko heiwa da yoh ko 191/10 na ki 44.4 Over. U Man-of-the-Match, u Manish Sharma (85) wa u Brian Lara M Sangma (31) toh kiwa kamai boon dooh. Ya ka NGH da yoh Wicket boon u Aditya Singh (3/28) wa u Tengsuang G Momin (3/41).
Ka NGH hawa kdong ya ka thong da ye ko wow kamai du 44 Run na ki 15.3 Over deiwa dooh lut ya ki Wicket. Da pynhaap ya ki Wicket da u Brian (3/9), u Aniket (3/12) wa u Alpriang (3/15).
Ha ka Zone 1, ka SCA (B) da jop ko ya ka kylla khlem wei da Bat nyngkong ko deiwa kamai 335/8 na waroh ki 50 Over heiwa u Man-of-the-Match, u Sachin Kumar da yoh u 154 Not Out na 138 bol wa kynthup ya 19 tylli ki 4 Run wa kawi ka 6 Run. U Roshan won da yoh u 63 na 47 bol (4x4s, 5x6s) wa u Prashant Ojha 39 na 25 bol (3x4s, 2x6s). Na kiwa kawang bol ka AJCA, u Dawao Passah da lehbha u deiwa yoh 3/79 uwa da pynhaap leh ya u Roshan wa u Prashant. U Chwamiki Ryngkhlem won da yoh u 2/55.
Kiwa kawang bol ka SCA (B) da ye ki wow pynhaap lut ya kiwa Bat ka AJCA da 119 na ki 22.4 Over. U Dharkison Pariat da lehbha u na kiwa Bat deiwa yoh 42 tangwa da haap noh u ha ka Over wa 15. Na kiwa kawang bol ka SCA (B) da lehbha u Rohit Kumar Yadav (3/11), u Gavineal Marpna (2/20) wa u Andrew Jyrwa (2/27).
Mynstep ka yalehke ha ka Zone 1 hapoh ka Group B, ka South West Khasi Hills daw yachem ko waka Ri-Bhoi. Katwa ha ka Zone 2, ka East Garo Hills daw yachem ko waka South Garo Hills.
