Hadien wa sdang hiar thma ka Russia ya ka ri Ukraine ha ka 24 Thohlakhmi, i yakhun da man i iwa joor bha hapyrdi ki chipai yong kini ki ar ri khamtam hadien wa pynlaitlooid ka Russia ya ki ar tylli ki bynta ka Ukraine kiwa kynthup ya ka Donetsk wa ka Luhansk.
Kani ka thma kat dang mih ki sngi dang joor ko wot hadien wa boon tylli ki ri da pyrchah ki ya ka wei da kyntu ki ya kini ki ar ri wow wan cha ka miej yaklam wei wow wanrah biang yei chongsuk.
Ha ki tayaw wa dadep kiwa mihkhmat kini ki ar ri da yachem ki ha ri Belarus wow pynbait ya ki kaam wei iwa boon dooh toh kiwa yatoh wa i sangeh yasiat chipor wei wow elaad ya ki bru paidbah wow mih ki na ki sor wa ki thaw wa joor i yakhun.
Ha ki sngi wa dadep neiliang ka ri Ukraine da pdiang ko ya ki chipai na baar ri wow yarap wow yada wei wow yaleh pyrchah ya ki chipai Russia katwa neiliang ka Russia leh da sdang ko wow pdiang ya ki chipai na baar ri khamtam na Middle East wow wan yarap yakhun ya kani ka thma.
Katkam wa man ynne ka sngi ki khubor wa tikna da ong ki wa neiliang ki chipai ka Russia da kærkut ki talawiar ya ka nongbah ka Ukraine, ka Kyiv wei da sdang tia ki wer pa wer cha kani ka nongbah.
Neiliang ka Pentagon leh ynne ka sngi da pyntikna ko wa kamwa 95% ki chipai ka Russia dang man ki kiwa yatylli wei da pynkhreh ki wow psiah noh chapoh kani ka nongbah hanlada em i yakhun pyrchah wa joor na ki chipai ka Ukraine kamjooh leh ki paidbah kiwa da rah suloi wow yada ya ka ri wa ka nongbah Kyiv yong ki deiwa da tih bha yow yieñ skem ha ka yaleh.
