Ka Dorbar Chnong Myntriang, East Jaiñtia Hills District deilang waka KSU Myntriang Unit da pynsñiaw ki yei pyrchah wa joor hajrong i wan noh jhep ka Jowai Municipal Board hapoh ka chnong khlem da yoh bor na ka chnong wei khlem da pyntip chwa cha ki bor pynlai chnong.
Ini i wan noh jhep ka Municipal ha chnong Myntriang da chem ha ka 11-03-2022 wei neiliang ka chnong da pynman ko ya ka dorbar ha ka 12 tarik uni u bnai yow pynman ya ka takit.
Hawa takit ka chnong da chem wa emkti lang uwi na kiwa chong chnong uwa da yah luti wow tyngkheiñ yaki kyndon ka chnong.
Wei hawa takit ya uni u bru, da phla u wa em kiwi de kiwa emkti wa kynthup ya u Montri sorkar wa u Chairman ka JMB.
Ka KSU Myntriang da dawa ko wow sangeh chi syndon yei wan noh jhep hapoh u pood u ang ka chnong wei heijooh i por deilang waka chnong da e por ar sngi ya ka JMB wa toh u wan pynkhooid ya itai i jehp wei wow kit cha watoh u kit.
Da maham leh ya kitu ki dalal kiwa yah ya ka JMB chapoh ka chnong yow noh yei jhep kiwa hun du wow yoh poisa khlem da kheiñ yei maa wa yang ya ka chnong ka thaw.
Da ong leh wa da yoh yutip wa kini kiwa yahluti da yoh nong ki hadooh T. 5000 kawi ka kari.
Da beiñ leh ya u Montri wa ya ka Municipal wa wan noh jhep ki hapoh ka chnong kamjooh yei tlot u Montri wow pynyoh yei thaw noh jhep ya ka Municipal.
Puræ leh: Kular u Sniawbhlang wow kit noh yei jhep na Iawmusiang myntu i janmiet
