Ym dap T. 2 klur wow chna pynmiat ya ka Umiam View Point: Sniawbhalang

Uwa yahkhmat ka Liang Pyrchah kamjooh uwa yahkhmat ka All India Trinamool Congress (AITC), u Dr. Mukul Sangma da ong u wa ka sorkar hap ko wow pynbait yei rukom pynlai kari katkam ka yukheiñ ka PWD neidaw wa da chna da tei ya kiwa boon ki jait ha rood sarok wei boon daw toor ki chadooh cha u sarok ka sorkar.

U Dr. Mukul da ong u ya ini hapoh ka yung dorbar ynnin ka sngi hawa yaklam hajrong i khynnia kari ha ka Umiam View Point wa boon ki kari wa sangeh heipor wa wan psiah ki cha Shillong, kamtæ ka sorkar toh u tip ko hadooh heiwon toh i bynta u sarok yow lait u chitom mynstep mankawi manda kwah u pynheh ya u sarok.

Hachwa ini, u Montri ka chnat Tourism, u Sniawbhalang Dhar da khana u wa hapoh ka Scheme ‘Beautification of Umiam View Point’ da yoh yei mynjur T. 2 klur naka Ministry of Tribal Affairs heiwa da paan T. 7 klur.

U Sniawbhalang da ong u wa kani ka poisa ym dap ko yow chna ya waroh iwa da kwah u leh ha ini i thaw wei da pynchna du chi bhah na iwa da thmu wei ka chnat kattæ dang thooh ko yow yoh yarap poisa na kiwi ki thaw.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Neiliang u MLA ka AITC na Umroi, u George B. Lyngdoh da ong u wa da ka poisa wa T. 2 klur ka sorkar ye ko wow pynchna ya kiwa emkaam ki paidbah u pynemkaam kamjooh ka thaw pynyieñ kari neibhah kani ka thaw ym em de man ko kawa yoosuk neidaw wa da tngit ware wei ym em biang leh ki paikhana wa i thaw noh jhep.

U George da ong u wa lyngba ka T. 2 klur Ileh ym booh tang ki Solar Light leh ha kani ka thaw neibhah hei miet boon ki kari wa pynyieñ ha ini i thaw.

U MLA ka Nonthymmai, u Charles Pyngrope da ong u wa da ka T. 2 klur toh u ye u booh paikhana, u chna pynmait dur yei thaw, u booh thaw pynyieñ kari iwa daw chongdor du T. 94 lak katkam wa kheiñ u.

U Charles da kylli u leh na u Montri lada bien u yaklam wa u Architect uwa da pynkhreh wa lada bien u pynbiang chwa ya kini kiwa emkaam deiwa khlem ktah ya i kreh wa da thmu.

U MLA ka Mawlai, u Process T Sawkmie da kylli u yi wa khang ya ki dukan dai baam kiwa jooh em heini.

U Montri da pyntip wa da hap khang da ki bor District neidaw wa em ka khlam COVID-19.