U President ka Pakistan, u Arif Alvi da pyndam, da pynkut noh u yei krehkaam ka National Assembly ka ri hadien wa da tyrwa da u Prime Minister, u Imran khan ynne ka sngi iwa mut wa daw hap pynman Election noh ha kini ki 90 sngi wow wan.
Ini da jia i hadien wa u Imran Khan da pynkhyrngiat u ya ka liang pyrchah hawa e yei klam cha ka ri lyngba ka TV wa da phah u ya u President wow pyndam noh ya waroh ki Assembly.
I kylla ha ki kaam saiñhima sima ha Pakistan da jia smat bha i hadien wa da tyrwa wow wanrah da ka No Confidence Motion pyrchah ya u Imran Khan deiwa ong wa ym em de yoh u yei kyrchaan yong kiwa boon heiwa ka Muttahida Quami Movement Pakistan (MQM-P) da dam noh ko wow e yei kyrchaan wei da lai ko wow kyrchaan ya ka liang pyrchah ka Pakistan People’s Party (PPP) yow kyrchaan leh yei wanrah ya ka No Confidence Vote ha ka National Assembly kawa em 342 ngut kiwa mihkhmat paidbah.
Hapoh ka National Assembly, u Deputy Speaker, u Qasim Suri uwa pynlai ya ka dorbar ynne da kyntait u wow pdiang ya ka No Confidence Motion deiwa ong wa man ko pyrchah ya ka Article 5 ka Constitution ka Pakistan.
U Imran Khan da pynbaad bait u wa kani ka No Confidence Motion toh deiwa tuklar ki bor kiwa na baar ri wei ki nong Pakistan toh u em ki yei hok yong ki wow jied ya kiwa synchaar khadar, heiwa hakhmat yong oo da em le tylli ki luti wa ye u jied kitæ toh wow hiar chuki, u pdiang ya ka No Confidence Motion lane wow pynman Election deiwi tawon.
Ka Pakistan Tehreek-e-Insaf toh ka Party wa da seiñ da u Imran Khan wei kawa synchaar ha Pakistan nadooh 2018 hadooh ynne.
Neiliang ka Pakistan Army leh da kyntait ko wa emkti ko ha ini wa jia ynne hapoh ka ri.
