Ka East Jaiñtia Hills man ko kawi na ki thaw wa mahajon bha heiyatoh wa ki mar poh-khyndaw khamtam u mooyong, u moochuni wa kiwi kiwi tangwa i tih ya kini ki mar ha ki phaw snem wa dadep da sakhi leh yeiwa yap ki loom kamjooh ki thaw rep neidaw wa da booh, pynchong, wa pynhaap ya kini ki mar hadooh wa da man bih i khyndaw wei ymye de wow mih kiwon kiwon ki jait mar rep ha kiwa boon ki thaw.
Tangwa ha kani ka kynti kawi na ki manbei, ka Kyrsiew Ryngkhlem na Wapungskur, East Jaiñtia Hills District dei mynsien raikut da kreh ko wow pynkhai-im biang ya i thaw wa i kpær yong ka deiwa pynemkaam ya ki mar kiwa em talawiar yong ini i thaw.
Ka Kyrsiew da khana ko wa heipor wa thied ko ya ini i thaw da man i kam i thaw pynlang (Depot) mooyong donhi khlem em ki dieñ, ki jhoor wa ki syntu, tangwa dei mynsien wa raikut da ye biang ko wow pynkhai-im ya ini i thaw wot hadooh wa da ye ko leh wow psa ya ki khon ki kti yong ka deiwa dai ya ki jhoor, ki syntu wa thung ko la hei tlang næ lyur wot hadooh wow dai wei sboh khyndaw.
Ya ini i kpær da ye wow pynkhai-im biang dei pyrchang yong ka wow pynman sboh ya i khyndaw deiwa pynkylla ya ki phlang ki ra’nem, ki ait (blang/masi) kamtæ ter ter hadooh wa da ye wow pynemkaam biang wow thung u tep ha ini i khyndaw.
Hadien wa yoo wa da sdang khai-im wei man sboh biang ini i khyndaw neiliang ka yung krehkaam ka Meghalaya Basin Development Authority (MBDA) da wan kyrchaan ko ya kani ka manbei deiwa e ya ki ar tylli ki top wow pynman sboh ko lyngba ka Innovation Fund.
Neiliang ka Kyrsiew da ong ko wa heithaw wow e da ki sboh dawai (Chemical) da chem ko wa dang lah deiwa pynemkaam da ki stat tynre (Organic) wei katni da ye ko wot wow dai ya ini i sboh cha ki yaaw ha kylleiñ ka Ri-loom Jaiñtia wei da man ko kawa smat wow esikai ya kiwi tawon heiyatoh wa ini i kaam.
Khaddooh da kyntu ko ya ki paidbah ka thaaiñ wa em mooyong wow tlep ki ya i thlu mooyong deiwa kreh chitom wow ye wow pynyirngam biang ya i thaw khnang wow myntoi ka mynried mankawi.
