Hadien wa mih i beiñ na kiwa boon yei dawa ka Lawei Ba Phyrnai wow pynlait ya u Chairman warim ka HNLC uwa da chah rai pynrem leh ha ka yung bichaar kam uwa slaitbor ya ki khynnah kynthai heiwa ka Lawei Ba Phyrnai hadien ini da ong ko wa ym em phah ko ya kani ka email wei toh i buit ki pulit yow pynkut yei mynsien u Dorphang.
Ynne won ka Lawei Ba Phyrnai da phah khubor biang ko yow pynkylla noh heithaw i dawa pynlait ya u Dorphang deiwa dawa wow pynkylla thymme noh ya ka Reservation Policy wei wow kyrriah noh yei pait ya ka ki 12,541 ngut kiwa sikai SSA napoh ka State Implementation chapoh ka Education Department kam ki wareh pura katkam ka kyndon ka SSA RTE deiwa e por wow leh yeini hadooh ka 09-09-22.
Lada ka sorkar ym leh ko yeini, ka Lawei Ba Phyrnai da maham ko wow tympdung ya kawi ka skur Lower Primary School.
Kam wow pynkynmoo wa ka Lawei Ba Phyrnai da thoh ko cha ka HNLC wow sñiawbha ko wow phah ya uwi u bru yow lai tympdung bomb neidaw wym yoh ym dap poisa ko wow thied ya ki tiar tympdung.
Wei ini i maham wow tympdung ya ki yung skur leh da mih chiboon i beiñ na ki paidbah ki wym sñiaw yahaap ya ini.
Hawa kylli na ki ki pulit hajrong ini i kaam, da pyntip ki wa da chimkhia ki ya ini waroh wei ka takit dang lai ko chakhmat.
