Ka 83rd Senior National Table Tennis Championship da sdang ko ynne ka sngi deiwa em chiboon bha kiwa chimbynta heiwa da em 38 tylli ki dhab ki chynrang wa 35 tylli ki dhab ki kynthai iwa mut waroh kiwa yaleh Table Tennis da em ki palat 450 ngut heiwa kani ka Championship daw poi ko cha wakut haka 25 tarik uni u bnai ha Sports Authority of India Training Centre kawa da pynman da ka Meghalaya Table Tennis Association deiwa kyrchaan ka sorkar Meghalaya.
Ha ka yalang wai da pynman leh yei suki kiaw yoh kynmoo warom ya u Deenadayalan Vishwa, uwa yaleh Table Tennis uwa na Tamil Nadu uwa da khlaad ynnin hei ya tyrrah kari heipor wa wan u cha Shillong na Guwahati.
Da kynmoo warom ya oo da u Speaker ka Meghalaya Assembly, u Metbah Lyngdoh, u Montri ka chnat Sports and Youth Affairs, u Banteidor Lyngdoh wa na u Meghalaya Table Tennis Association President, u RG Lyngdoh kiwa waroh da pynsñiaw yei sñiawsih ya ini wa jia.
Da emlang leh ha kani ka sngi waka Director of Sports and Youth Affairs, ka Wanri Booth, u Meghalaya State Olympic Association Working President, u John F Kharshiing, u MSOA General Secretary, u Finely Pariat wa kiwi ki dkhot ka MTTA.
Neiliang u RG Lyngdoh hawa e yei klam da pynsñiaw u yei sñiawngooh ya waroh kiwa da wan najngai cha Shillong wei da yooluti u waka yalehke leh u man ko haka kyrdan wa yoosuk wa yathain.
Neiliang u Banteidor Lyngdoh da puræ u leh ya ki kyntien sñiawlem neibynta ka sorkar Meghalaya ya kiwa hayung u Vishwa, deiwa ong wa ini da man i i dooh nong wa khroo wei daw kynmoo ya oo yanom kamjooh ya ki kaam wa da leh u.
Neiliang u kongsan, u Metbah Lyngdoh da ong u wa sñiawkmen u wow yoo ya ki khynroo khyllood na waroh ki jylla kiwa dapoi cha Shillong wei da man iwa jop ya ka Meghalaya hawa da yoh ko yei mynjur wow pynman ya kani ka lympung.
Ynne ka sngi da pynman boon tylli ki yalehke deiwa yalehke chwa ka Railway Sports Promotion Board (RSPB), Bengal A, Haryana, Petroleum Sports Promotion Board (PSPB), Maharashtra A, Tamizhaga Table Tennis Association (TTTA), Maharashtra B waka Karnataka.
