U Deenadayalan Vishwa, u khloor yalehke Table Tennis ka Tamil Nadu uwa da dooh noh yei mynsien yong oo ha i chah tyrrah kari heipor wa lai luti u wow chibynta ha ka 83rd Senior National Table Tennis Championship, da tlep noh ya oo ynne ka sngi ha Chennai.
Hawa klam ha Shillong ynne ka sngi, u Coach u Viswa, u Ramesh Babu uwa naka Tamizagha Table Tennis Association (TTTA), kawa man kawi na ki ar tylli ki Association na Tamil Nadu, da ong u wa u Viswa em u yei sap wei em u ka mynried wa tyrchaaiñ bha uwa da jop boon tylli ki yakob ha i por wa tbian hapoh ka ri wa cha baar ka ri leh kamjooh ha ka kyrdan Junior wa Sub-Junior.
U Vishwa wa uwa yah ya ka Tourist Taxi, u Dipal Das toh ki arngut kiwa da khlaad ha ini i chah tyrrah kari ha kawi ka Truck hajan Shangbangla, Ri-Bhoi. Le ngut kiwi kiwa yalehke wa u Viswa, kitæ u R Santosh Kumar, u D Kishore Kumar wa u S Abhinash Prasannaji da mynsoo ki tangwa da yoh ki wow mih napoh ka NEIGRIHMS wei da liwan yung ki ynne ka sngi.
Neiliang u Babu da e khublei u yaka Meghalaya Table Tennis Association (MTTA), ki pulit ka Ri-Bhoi kamjooh ki bor District wa yarap ki wow pyndep yeiwa emkaam heiwa da yoh wow kit yei metyap u Vishwa pyn haka sngi wa bood cha Chennai.
U Babu da e khublei u leh ya ki dkhot ka MTTA kitæ u Joydeep Das wa u Vikram Aditya kiwa da yarap wow pynlut por waroh chi miet ha Nongpoh.
U Babu da khana u leh wa ha ka sngi Bibar wa jia ini, kiwa yalehke kiwa em 12 ngut ki dkhot ka TTTA da lai luti ki da le tylli ki Tourist Taxi.
Da ong u wa ym ye wow pynbaad ya uwa yah kari neibhah i bakla toh i yong ka Truck kawa da wan neiliang ka liang wa bakla u sarok.
Kiwi ki dkhot ka TTTA u pteiñ ki yei yalehke ha Shillong hanla em ini i jia wa sñiawsih ya u Vishwa.
