Ka Seiñ Kur Dkhar Wapung Circle ynne i step da yoh ko wow lai e yarap cha kawi ka manyung kawa da chah ktah joor hei iñ yung iwa da chah baam lut hei diñ ha ka 15 tarik uni u bnai.
Kani ka manyung toh kawa em ha ka chnong Tuber Kmaishnong, East Jaiñtia Hills District heiwa neiliang ka Seiñ Kur Dkhar Wapung Circle da yahkhmat da u Shaniahskhem Dkhar uwa man u President ka Seiñ Kur Dkhar Wapung Circle hei emlang u General Secretary ka Seiñ Kur Dkhar Wapung Circle, u Kyrshan Dkhar deilang wa kiwi de ki dkhot ka Seiñ Kur Dkhar Wapung Circle.
Neiliang ka Seiñ Kur Dkhar Wapung Circle da yoh ko wow e yarap da ka poisa kam i dak yong i sñiawlem wei e mynsien ya kani ka manyung kawa da maad ya ini wa sñiawsih heiwa neiliang u Shaniahskhem hawa ya syllok wa kani ka manyung da pynsñiawngooh u leh yei sñiawngooh ya u Blai wa ym em i jia wa sñiawsih wa khlem dooh yei mynsien bru.
Da kyntu u leh ya ka yung wym toh u dooh mynsien kam ha ini i por tangwa u chaniah ha u Blai wa booh wa thaw wei leh ha ka chnong hi waroh kawi wei da pynsñiaw u leh yei sñiawngooh ya ka dorbar chnong Tuber wa da yarap ko u pynchna wut wut deiwa e kti tidiang timun lang ki paidbah.
Da emlang leh ha kani ka sngi wa kiwa yahkhmat ka chnong Tuber Kmaishnong wei da yoh leh i klam pdiang na u Waheh Chnong ka chnong Tuber uwa da pynsñiaw yei sñiawngooh ya ka kur wa da ya emlang ko hadein wa jia ini wa sñiawsih.
Puræ leh: Baam lut i diñ ya i yung kiwa sah khonswet ha Tuber Kmai Shnong
