Ka 33rd District Level Industrial Exhibition wa ar sngi wa pynman da ka yung krehkaam u General Manager District Commerce & Industries Centre, Jowai da wan wai ya ka ynne ka sngi da u MLA ka Jowai uwa man leh kam u Chairman ka MCCL, u Wailadmiki Shylla kawa da pynman ha Ladthadlaboh Indoor Sports Hall wa em ha Madan Dai Masi, Ladthadlaboh.
Ha kani ka Exhibition da em 26 tylli ki dukan wa wan pynyoo rong kiwa da chimbynta lang leh da ki chnat sorkar kam ka District Sericulture, Handloom, AH & Veterinary, Meghalaya Basin Development Authority, Jowai, Senior Dairy, Social Welfare, ki Self Help Group wa ki Society napoh ka District.
Hawa e yei klam heipor wai ya kani ka Exhibition, u Wailadmiki da yaroh u ya ka chnat wa da pynman ko ya kani ka Exhibition kawa man kam ka rynsan yow e mynsien ya kiwa chna tiar, chna tar wa kiwa pynmih ya ki marbaam wa boon jait yow yoh ki bru wow yoo wei wow tip ya ki mar wa chna ki kamjooh leh yow ye ki wow dai.
Da pynchlur u leh ya kiwi wow seiñ khih ki da i yong ki hi khamtam ki khynroo wow chim kabu ki ya ki Scheme wa e da ka District Commerce and Industrial Department.
Hachwa ini, u District Manager, u P. Toi hawa e yei klam wai phang da ong u wa kani ka Exhibition man ko kam chibynta i lehkmen yei dap 50 snem ka Meghalaya. Da khana u leh chaphang kiwa boon ki Scheme wa ye u yoh naka yung krehkaam yong oo kam ka Prime Minister’s Employment Generation Programme (PMEGP) kawa wan naka sorkar pyrdi waka Homestay Scheme.
Ki Functional Manager, ka S E Kharpran, u C. Sutnga wa u Assistant Director of Cottage, u FG Syngkon toh kiwa kiwa da klam ha kani ka sngi.
