Ka South West Khasi Hills CA da jop suk ko yaka East Jaintia Hills da 5 Wicket haka Group B ka Zone 1 ka Inter District U-19 Boys Cricket Tournament 2022 wa pynman ha Khliehtyrchi daka AJCA neibynta ka MCA ynne ka sngi.
Ya ka kylla-khlem da jop daka East Jaintia Hills wei da jied ko wow Bat nyngkong, heiwa da yoh ko 95/10 na ki 28.2 Over. U Nishikania Sinha da man u uwa da kamai Run rap boon ya ka EJCA deiwa yoh 37 na 46 bol. Neiliang ka South West Khasi Hills CA won, u Wilson Nongrum da yoh u pynhaap 4 Wicket na ki 5 Over.
Hawa kdong won ya ka thong, ka South West Khasi Hills CA da ye ko u kamai 96 Run deiwa dooh ko 5 Wicket na ki 16.5 Over. U Pynshailang Lyngdoh toh uwa da lehbha da ka Bat heiwa da ye u kamai 23 Runs naki 25 bol. Neiliang ka EJCA, u Rohit Sharma wa u Karan Tamang da ye ki u khur mar 2 Wicket.
Ya i naam Man of the Match da yoh da u Wilson Nongrum.
Haka Zone 2 won kawa da pynman ha Tura ynne ka sngi hapyrdi ka North Garo Hills CA waka East Garo Hills CA, ka East Garo Hills CA da jop ko da 5 Wicket wei yei naam Man-of the Match da yoh da u Gulgul Sangma.
Mynstep ka sngi ym em yalehke ha waroh ar Zone, heiwa daw pteiñ won ha ka 23 tarik heiwa haka Group A ka Zone 1, ka SCA (A) daw yachem ko waka SCA(B), katwa ha ka Zone 2 won, ka North Garo Hills daw yachem ko waka Tura DCA.
