U Montri wa pait ya ka puræ puthi ha ka jylla, u Lahkmen Rymbui da khana u wa Vice Chancellor yong ka North Eastern Hill University (NEHU) da yoh pdiang u ya ka chithi wa waroh ki skurbah yong ka sorkar India wa ki College ka jylla kiwa haap hapoh kini ki skurbah daw thap ki wow pynpsiah Class ya ki khynnah katkam ka Common University Entrance Test (CUET).
Da ong u wa ini mut wa waroh ki khynnah kiwa dadep ya ka Class XII hap bait ki wow yaleh ya kani ka Exam neibynta wow yoh puræ ha ki College wa yakreh wa ki skurbah ka sorkar pyrdi, neibhah kamwa man katni ym em de da kiwi ki laad.
U Rymbui heijooh i por da pdiang u wa neiliang ka sorkar jylla dang em ko chiboon i eh wow pynman ya kani ka Exam neidaw wa khim i por, wei ha ka jylla i bordiñ ym biang ha kam kini ki por wa joor u slap, ka Internet leh ym pu biang. Da khana u wa katkam i pynbna yong ka National Testing Agency (NTA) ka Center wow pynman ya ka CUET u em ko kawi ha East Khasi Hills wa kawi won ha Ri-Bhoi District. Da ong chooh chooh wa ka CUET katni man ko kawa emkaam bait wei ya ki Center neiliang ka NTA da ong wa daw booh ha man ki District ka jylla.
Hawa kylli, da ong wa ha ka CUET khlem booh ko ya ka ‘Pass Mark’ tangwa da ka ‘Percentile’ kiwa ye u booh da ki College wow pynpsiah ya ki khynnah. Da ong wa hadien habood kani ka rukom daw yarap hi ko ya ki khynnah.
Hawa kylli chooh chooh, u Rymnbui da khana u wa ki khynnah hawa pynpsiah pyrtuid wow yakhun ya ka CUET daw hap ki leh wow su T. 650 neibynta ki jaitbru ri-loom namo ki Schedule Tribe.
Ka chnat puræ puthi ka jylla ynne ka sngi da lum ko ya ka yalang hapyrdi ki bor pynlai ka North Eastern Hill University (NEHU), ki Principal yong ki College waphær waphær ka jylla wa ka chnat puræ puthi yong ka sorkar jylla, wa da chimbynta da u Montri, u Lahkmen Rymbui. Kani ka yalang da pynman hadien wa da phah na ka UGC wow pynman noh ya ka CUET neibynta wow pynpsiah Class ya ki khynnah cha ki kyrdan Under Graduates wa Post Graduates.
