Da: U Chandame Sungoh
Lada pait kat kam i pyrtuid ini wa da thoh te jan ye phi u ong wa katæ kawa maya O ym em ko cheini toh ka bru næ ka khyllood ka chan O. Tang wym toh kamtæ, katæ kawa maya O toh kawi naki seiñ saiñ pyrthai næ kawa ong i hei ktien yong kiwi kam ka Political Party wa man leh ka Party Ri-loom Khasi Jaiñtia (Regional Party) ka warim tam haka jylla yong i.
Katæ toh ka Hill State People Democratic Party (HSPDP) kawa da seiñ, da pun, da kha yaka haka ha 1 tarik u bnai Khonchonglad (November) 1968, soo snem chwa wow yoh yaka Meghalaya.
Nga ym toh utæ uwa thoh kot wa biang ka kyrdan puræ puthi lane i tip i stat kam kiwi kiwa thoh kot. Ym toh leh uwa tip bha ya katæ ka parom warim yong ka jylla yong i, hanla kattæ leh u pyrchang O u thoh khnang wow pyntip yaki khon ka Bri U Ynñiawtrep Ynñiaw Wasa chaphang kani kawa maya yong nga.
Related posts
Lada kyruiñ i cha ki parom kiwa dadep dalai te chem i waka jaitbru yong i toh kawa chah pynbiej kawa chah chet chukor næ chah lehbeiñ. I leh wa ong O kamtæ? Ngait O jan bar ya nga te phi wa rap tip bha yeini. Katkam ka yutip wada yoh, ka sorkar pharæng da sdang ko u synchaar lehbor yaka ri Khasi Jaiñtia yong i nadooh u snem 1833 hadooh u 1947 kamwa 114 snem tam. Nadooh won wa yoh i yei laitlooid haka 15-08-1947, sñiaw kamwa da yoh sakhiat i ya itæ i laitlooid næ yei hok yong i. Tangwa mar dei khangtleiñ, kamwa ong kiwa stat klam te, “Lait na kti u thlen, kluk ha tyndam u khla”.
Katkam wada ya soi ki Syiem ka Hima Khasi wa khut ki ka Federation of Khasi States waki waheh ka Indian Dominion hachwa wow saiñdur yaka ri India kam ka ri synchaar paidbah namo ka Democratic Country katæ ka Instrument Of Accession (IOA) haka 15-12-1947, ka Ri Khasi Jaiñtia yong i toh u yoh ko yaka jylla wa pura nadooh nyngkong ki sngi wa sdang yaka ri India kamwa yoh ka Assam, Manipur wa Tripura. Kat u yoo ym toh kamtæ, da ngiat ya i cha ka Sixth Schedule hei kyrdan District Council hi-eh hapoh i synchaar ka sorkar Assam.
Kamtæ ki waheh yong i da hap ki u yaleh u yakhih wow yoh yaka jylla kawa pura. Kamtæ ka yakhih da sdang ko nadooh ki snem 1955-56 hapoh ka Party wa tip kam ka Eastern India Tribal Union (EITU). Hadien neitæ won, wan yabi sa ki Garo hei pynyatoh wa man ki para wa chim jait naka kynthai wei hajrong ini da chna won ki daka All Party Hills Leaders Conference (APHLC) heiwa u Capt. W.A. Sangma da man u kam u President wa nyngkong.
Hapyrdi wa kop wa rahi bha i diñ yong i yaleh, i mynsien ksuid, mynsien soitan da psiah u ha u Capt. W.A. Sangma wa haki kattu katni ki waheh Khasi yong i. Itæ i mynsien ksuid, mynsien soitan toh wow pdiang yaka Sub-State kawa khlem u pood u ang uwa tikna. Mar yatip wa uni u Capt. Sangma da em u kaitæ i mynsien, kiwa yahkhmat naka jaitbru yong i kiwa dang tip yei hok yei sot da yieñ yaleh ki yeini wym em u sñiaw yahaap næ sñiawtooh sñiawtne ki wow pdiang ya katæ ka jylla kawa chiteiñ kawa khlem u pood u ang uwa pura. Neitæ i daw da mih i wym ya sñiawthooh yumut, i jæd i pra hapoh kani ka Party. Ha kawa uni u Capt. W. A. Sangma wa u Brington Buhai Lyngdoh da beh seiñ beh Party ki ya u Hopingstone Lyngdoh waki lok ki yong oo naka Party APHLC du neidaw wym ya ngait ki wow pdiang ya katæ ka Sub-State kawa khlem u pood u ang.
Kamtæ, dei mynsien wa sñiawkhia wa sñiawchrai, u Hopingstone Lyngdoh wa kiwa bood yong oo kam u Meshak Kharkongor, u Aristerkhos Basaiawmoit wa kiwi tawon ki 13 ngut ki khroo pyrkhat, khroo yutang da seiñ ki yaka Hills State Volunteers Adhoc Committee (HSVAC) haka 03-07-1968 ha kawa kini ki Volunteers ha kylleiñ ka ri Khasi Jaiñtia da yaleh chitom ki doh wa mynsien wow yoh yaka jylla wa pura. Hadien neitæ da chna pynmiat pynbha lane chna pynskem won ki daka Hills State People Democratic Party (HSPDP) haka 01-11-1968 ha kawa u Hopingstone Lyngdoh da man u kam u President wa nyngkong wa u Aristerkhos Basaiawmoit kam u Secretary wa nyngkong dooh.
Tangwa sñiawsih u ong wa ka jait bru yong i katda toh ka jaitbru Tham da ya boh yataan hadooh wa pdiang yaka jylla kawa khlem pood khlem ang kawa pynchitom pyn jynjar yaki hajar ki paradoh parasnaam yong i kiwa chong wa sah chaki thaw khappood. Hadien ini u Capt. W.A. Sangma da yoh u leh wow man kam u Chief Minister wa nyngkong wei da pynskem wot yei pyrtuid jylla hei ktien yong kiwi wa mut ka yung ki lyoh (Abode of Clouds).
Kamwa da ong chwa O wa kani ka Party toh ka warim tam hapoh ka jylla yong i kawa yieñ leh haka yurim wow yachah yakær yei hok i khyndaw wa u chyiap yong ka ri waka jaitbru yong i. Hanla kattæ leh kiwa boon ki bru yong i khamtam ha ri Jaiñtia wym sñiawthooh wym pdiang ki ya kani ka Party. Em leh ki bru Pnar yong i kiwa ong ka Party Khasi, ka Party Khynriam. Ya kuhæ pathan ki ya kitæ ki Party Garo, Party Dkhar kam ka Congress, BJP, TMC wa NPP hei thaw wow ya tylli ya ryntih ha kawi don ka Party wow yoh u synchaar pyn da i ya i hi.
Disclaimer: The views and opinions expressed in this article are those of the author’s and do not necessarily reflect the official policy or position of this organisation.
