U MLA ka Raliang, u Comingone Ymbon ynne ka sngi da saam u ya ki Cheque wa T. 1.18 klur cha ki 175 tylli ki seiñ ki warep namo ki Producers Group kiwa em hapoh ka Laskein C&RD Block ha ka yalang wa pynman ha madan Moosyiem, Shangpung heiwa ya kani ka yalang da pynman da ka Meghalaya Basin Management Agency (MBMA).
U Comingone Ymbon hawa e yei klam kam u kongsan da pynchlur u ya ki warep wow pynemkaam hok ya kani ka yarap poisa da ka sorkar yow mih soh wei wow yoh yei myntoi. Da pyntip u leh wa ka sorkar lyngba kani ka FOCUS daw yarap ko wow kynrong ya ki warep yow ye ki u pynmih rap boon ki mar rep. Da pynchlur u leh ya ki chynrang warep wow seiñ ki leh ya ki seiñ yow yoh myntoi ki.
Da yaroh u leh yei kaam wa da leh ki Self Help Group ha ka imlang sahlang kiwa da wanrah ya chiboon i kylla nadooh i khooid i jngiar wa kiwi kiwi de.
Da klam u leh yei chitom ka sorkar wow yoh yei thaw noh jhep neidaw wa boon kiwa pyrchah da ki kattu katni. Kamtæ da ong u wa hap wow pynyaar yei rukom pyrkhat wei wow krehlang waka sorkar yow yoh thaw noh jhep neibynta i bhah i miat ka District waroh kawi.
Neiliang u Dr. D.I Kjam, District Officer A.H & Veterinary, Jowai hawa e yei klam da pynchlur u ya ki warep wow chim kabu ya ini wa da e ka sorkar yow ye ki wow yieñ hei kjat yong ki hi. Da pyntip u leh wa ka sorkar lyngba u ka chnat A.H. & Veterinary da e ko ya ka ram kawa khlem i sut ya kiwon kiwon ki Cooperative Society wa wan chakhmat yow Register kam ka Piggery Society lane ka Multipurpose Society. Da kular u leh ya ki warep wa ka chnat u daw emlang bait ko wa ki.
Neiliang ka D. D Syngai, Additional Deputy Commissioner wa DPO ka Planning Branch, Jowai leh da e ko yei klam.
Ya ki kyntien e khublei da yoh na u Sywell Lyngdoh, District Project Manager, District Basin Development Unit, Jowai.
