Ka Khasi Students’ Union da pynsñiaw ko yei pyrchah yei dawa yong ki Khar Mator da iwi i thaw yow sah ki deilang waka poisa wow chna yung.
Ka Harijan Panchayat Committee (HPC) ha i yachem waka sorkar ha ka 25 tarik uni u bnai da pynsñiaw ko hajrong i dawa kyrriah na ka Them Ïewmawlong wei i dawa man ko wa ka sorkar u e poisa ko u chna yung ha kawi ka thaw kawa heh kamwa 10 Acre ha European Ward deiwa e mar 200 Square Meter yow chna yung.
U President ka KSU, u Lambokstarwell Marngar da ong u wa ki Khar Mator ym toh ki khon khlieñ kpoh yong ka sorkar, wei ka sorkar ym toh u ap lane u khongooh ko ya itæ i dawa.
Da ong u wa ini i leh ki Khar Mator ym toh wym kwah ki u mih namo wym bien ki u ya krehlang, tangwa i pyrchang wow pynyoo bor. Da pynrap u wa lada kiwa chong wa sah toh ki wakreh sorkar, toh i kaamram yong ki chnat wow chim kitkhlieh ya ki wakreh yong ki.
Neiliang u General Secretary ka KSU, u Donald V Thabah da ong u wa lada kitai ki bru sah pyrchah aiñ ki ha ki chnong tre ha Punjab, tharai ki da chah kyndang ki khlem i yarap.
Da ong u wa kitu ki kynhun kiwa jooh wan tukar neibynta ki Khar Mator ha kani ka jylla, toh u yah ki yow pynchna ya ka yung, tangwa cha baar na ka Meghalaya. Neibhah ki tre chnong kiwa chong dukan pyrchah aiñ, hanla toh ki Khasi dang chah kyndang ki. Da ong u wa ka sorkar toh u pynyoo ko yei bor wym toh u pynbiang iyi iyi ya ki tangwa toh u khyndang bait neibynta ka chong chngaaiñ ha Them Ïewmawlong.
Puræ leh: Dawa ka Harijan Committee 10 Acre i thaw waka poisa chna yung yow mih ki na Them Metor
