Ka yung krehkaam ka Krishi Vigyan Kendra (KVK), Jaiñtia Hills chirup i yakrehlang waka yung krehkaam ka Agricultural Technology Management Agency (ATMA), West Jaintia Hills da pynman ko yaka ‘Kisan Bhagidari, Prathmikta Hamari’ Campaign yow pynsñiawthooh cha ki warep yei rukom rep yow stiñ ka yukit yong ki nadooh hawa rep kamjooh ha ka kaam poisa poilaiñ kawa man leh kam chibynta ka ‘Azadi Ka Amrit Mahotsav’ namo i lehkmen yei dap 75 snem i yoh laitlooid ka ri India haka yalang wada pynman ha ka 26 tarik uni u bnai ha KVK Campus Wahiajier.
Hawa e yei ktien yahkhmat, u Dr. D. Pasweth, Senior Scientist & Head, KVK Jaiñtia Hills da pynsñiaw u yei lai luti heiyatoh wa i rep i riang nadooh wa yoh laitlooid kamjooh leh ki yalang pynsñiawthooh waphær waphær wa pynman daka sorkar pyrdi waka sorkar jylla neibynta i myntoi ki warep.
U S. Syngkon, Agriculture Development Officer (ADO), West Jaiñtia Hills da klam pynche u heiyatoh waka PM Kisan Scheme najrong wa batai u heiyatoh i emkaam ki ID ya ki warep neibynta u yoh ki Scheme yarap naka sorkar.
Ha kani ka sngi da e khusnaam da ka poisa ya u Foster Kharsahnoh uwa man kam u warep naka chnong Sohphoh kawa em hapoh ka Thadlaskein Block daka L. Lakiang, PD, ATMA West Jaiñtia Hills hajrong i jop yong oo wow rep tit, u ri syiar, ri sniang wei rep jhoor.
Haka bynta yachem yumut hapyrdi ki warep waki Scientist da yoh leh i klam na u H. Papang, hajrong ka phang ‘Plant Protection, on role of bio agent in agriculture for controlling pest and diseases’, ka B. Kharbamon, SMS Horticulture, hajrong ka phang ‘Natural Farming, Orchard Management in fruit trees’.
Da em leh i pynyoo rong yaki tiar wow pynemkaam hei rep i riang kamjooh i saam yaki symbe waphær waphær cha ki warep.
Ha kani ka yalang da em kamwa 94 ngut kiwa chimbynta wa kynthup ya ki warep wa ki bru yong kani ka chnat krehkaam sorkar.
