Ka Khynroo Khyllood Committee (KCC) yong ka Seiñraij Jowai ha ka thong wow wanrah yei sñiaw yajooh yajan hapyrdi ki para khynroo khyllood yong ki dong ki chnong waphær. Ha ka sngi Pynsiñ 30 Naitung da pynman ko ya ka sngi yachemlang ha yungwalieh ka Loompyrdi Iongpiah wei ha kani ka sngi kam wow e mynsien ya ki khynroo khyllood da wan sakhilang leh da u Pa Dolloi ka Elaka Jowai, u Puramon Kynjing, u O.R. Challam, President Seiñraij Jowai, u G.H. Bareh, Founder Secretary KKC wa kiwi kiwa chah khut sñiawbha.
Ya kani ka yalang da pynlai da u Ladwan Dkhar, Chairman KKC heiwa da yoh yei ngoohblai ngoohsyiem da u Rangbahmi Kynjing, Vice-Chairman KKC katwa u Sienmiki Lato, Secretary KKC hawa kut da e u ki kyntien sñiawngooh.
U G.H. Bareh kam uwi na kiwa sdang ya ka KKC hawa klam hapyrdi ki khynroo khyllood, kdar u wow niawtang ya ki por yong i lai luti ka Khynroo Kyllood Committee ha ka thong wow kreh yei miat i bha, ka ñiam ka rukom, dustur riti wei i myntoi ki khon ka Ñiamtre katwa kiwi won ki waheh wa da klam e mynsien wei sneiñ i kroo ya ki khynroo khyllood toh u O.R. Challam, wa u Dawmanchuh Lamar wa man uwi na ki khynroo wa embynta hei wow pyntoh pyntne ya ki ar tylli ki kot Ñiamtre.
Ya kani ka yachemlang da pynman kam chibynta i leh burom yei kynjooh yong i lai luti ka KKC cha u moomer wa 32 tylli ki snem wei da pynchoh pynchongchit ya kani ka sngi da ki rwai, ki chaad wa i leh pynyoo riam namo ka Fashion Show yong ki khon khyllood hei pyntoh pyntne wei pynlai ka Daisaika Dkhar, ka Wanisha Pakyntein, ka Hun-i Laloo wa ka Yuwaiman Bareh.
