Ka Dorbar Chnong Loompyrdi Iongpiah hadien i sangeh krehkaam i kit jhep yong ka Jowai Municipal Board hapoh ka chnong Jowai, da yoo da chem yei eh i khoo wa hap ki khon ka chnong u maad neidaw wym yoh de yei thaw noh jhep, kamtæ ha ka thong wow lait ki waboon walang nei niawliar niawtang yei dap i chlai yong i jhep ha man ki yung ki sem. Ha ka sngi Pynsiñ 30 Naitung da pynman ko ya ka e sikai wa kyrpang ya kiwa chong chnong chaphang ka Solid Waste Management næ itæ i rukom pynlang yei jhep hei dur i wow man sboh næ kylla spah.
U Alan Niangti, Waheh Chnong Loompyrdi Iongpiah hawa klam yahkhmat da ong u wa ka thong yong kani ka e sikai toh yow pynstiñ yei thij i pyrkhat yong ki khon ka chnong ka thaw ha kam ini i por yong i tynjooh neidaw wym yohlaad de u phah noh ya ki jhep ki jakhlia lyngba ka Municipal, kamtae yooluti u wa kani ka luti wa chim ka dorbar chnong u yarap ko ya ki manyung wa em hapoh ka dong ka chnong.
Ki bru stat bru chemphang kiwa da wan wow e i klam i batai ha kani ka e sikai toh u Dr. Rev. H.H. Mohrmen, President SURE, West Jaintia Hills District uwa da batai chaphang ki laad pynmih sboh nei jhep iwa mih na ki yung ki sem kiwa kynthup ya ka Natural Compost, Vermi Compost wa ka Bokashi katwa u Franky Laloo, Environmental Engineer, Meghalaya Pollution Control Board, Shillong won hei klam yong oo da pynsñiaw u hakhap u waboon walang chaphang ki yurim krehkaam ka Meghalaya Pollution Control Board wa ki aiñ yong ka Municipal heiyatoh wa ka Solid Waste Management.
Chooh chooh khaddooh chwa wow pynkut ya kani ka e sikai da em leh i saam ya ki ar jait ki Dustbin cha ki kattu katni ngut kiwa ya chimbynta kiwa man neibynta ki jhep wa pyut wa ki jhep wym pyut.
