Ka sorkar India da pynsñiaw ko yei pyrchah yei rukom kheiñ ka WHO ya kiwa yap na u COVID-19 hapoh ka ri heiwa ka WHO katkam wa kheiñ ko da man i palat ya iwa da kheiñ daka Civil Registration System (CRS) wa da pynmih daka Registrar General of India (RGI).
Ka sorkar da ong ko wa ka RGI toh kawa da leh ya ini i kaam da plat 100 snem wei da emkti lang da ki Chief Registrar ki jylla wa 3 lak ngut ki Registrar/Sub-Registrar ha kylleiñ ka ri wei ka WHO toh u chim ko da ki yukheiñ yong kini ym toh deiwa kheiñ antaad donhi ki wym ye u tikna.
Ka India leh da kdaw ko yei rukom bhah ka WHO ya ki ri hapyrdi ki Tier I wa Tier II heiwa ya ka India da booh hapoh ka Tier II heiwa ya kini ki ri da kheiñ deiwa antaad donhi (Mathematical Modelling Estimate) wot hadien wa ka India da biang i rukom chim yukheiñ ko.
Ka India da pyrchah ko leh yei rukom kheiñ wa tip kam ka Global Health Estimates (GHE) 2019 heiwa i rukom kheiñ deiwa leh yeini da mih palat i boon kiwa yap bar ya iwa em ki.
Kam wow pynkynmoo wa ka WHO da antaad ko wa da em 47.4 lak ngut ki bru wa yap na u COVID-19 ha India ha u 2020 wa ha u 2021 heiwa ka India hadooh ynne ka sngi da ong ko wa em 5.24 lak ngut kiwa yap.
