Kiwa bait kti hei yasiat namo ki Target Shooters ka Shooting Association of Meghalaya da man ki kiwa da chah ktah i pynkhreh yong ki heipor wa em ka khlam COVID-19 tangwa da pynyoo ki yei sap yong ki ha ka 4th Meghalaya Games 2022 kawa dang dep pynman.
Ha kani ka Meghalaya Games da pynman ya ka leh deilang kam ka 7th State Shooting Championship kawa da pynman ha ki thaw yasiat ka Assam Regimental Centre kiwa hapoh yung wa cha lait ha Happy Valley.
“Kani toh ka Championship wa nyngkong hadien ka khlam wei ngait O wa katni waroh da poi ki cha i rukom pynkhreh wa biang,” da ong u President ka SAM kamjooh u Working President ka Meghalaya State Olympic Association, u John F Kharshiing ha ka yalang pynkut. “Deiwa kyrchaan ka Assam Regimental Centre, da yooluti i wa ka Meghalaya daw lehbha ko ha ka North East Olympic Games,” da ong chooh chooh u. Kani ka NE Games toh kawa daw pynman ha Shillong ha uni hi u snem.
Neiliang ka North East Small Finance Bank da e yarap ko leh da ka Rifle neibynta ka SAM, kawa da ekti ha ka yalang wai pyrda ya ka Meghalaya Games ha ka 3 tarik uni u bnai. Kini ki jait Rifles toh kiwa da hap wow wanrah na baar ri wa chna da ka Company Walther kiwa chongdor da ki lak tyngka.
“I sñiawngooh i ya ka NESFB wa e yarap ko da kani ka rifle,” da ong u Kharshiing. “Kani toh ka jait yalehke wa syad bha wei deiwa em da ka yong i hi ka Rifle daw yarap bha ko yow pynku ya ka yalehke. Da yooluti i leh wow yoh da ka yong i thaw siat namo ka Shooting Range ha kawi ka sngi neibhah da yoh yei kylli chaphang ini na kiwa boon ki bei ki pa wa na ki skur.”
U kongsan ha kani ka sngi toh u Brig DCS Kanyal, uwa da ong wa em chiboon ki bru na Meghalaya kiwa em yei sap kamjooh ha waroh kawi ka thaaiñ North East wei da kitbok kitrwiang u ya waroh kiwa yasiat ka SAM waka MSOA neibynta ka mynried yong ki.
Da ong u wa ka thaaiñ nongbah ka ri namo ka National Capital Region toh kiwa lehbha ha ki kaam yasiat neibhah wa em ki ya ki thaw sikai wa ki thaw siat wa biang tangwa ki bru wa em yei sap won kiwa boon dooh toh em ki ha North East.
U Kharshiing da yaroh u ya u General Secretary ka SAM, u Neil Sootinck, deiwa ong wa da man u kam u chrot ka Association hawa pynman ya kani ka yakob.
U Sootinck da ong u wa ka SAM da em ko i yatoh wa khlan bha waka ARC wei da e khublei u leh ya ka sorkar jylla wa ya ka MSOA wa da pynim biang ki ya ka Meghalaya Games.
Kiwa jop ha kani ka yakob yasiat (Shooting):
10m air rifle senior men – 1 Dennyson Kyrsian, 2 Rajdeep Ghosh, 3 Wanpliborlang Nongsiej
10m air rifle women – 1 Anjali Singh, 2 Veronica Buhroy, 3 S Rebecca
10m air rifle Services men – 1 Sanjit Sarkar, 2 Andrew R Buhril, 3 Jangminlen Touthang
10m air rifle junior men – 1 Abhay Mukharjee, 2 Khraw Jyrwa
10m air pistol men – 1 Pynkhraw Kharshiing, 2 John Thounaojam, 3 Davis NR Marak
10m air pistol Services men – 1 Bishal Debnath, 2 Thangthahring Khumlo, 3 Gingoulen Gangte
10m air pistol women – 1 Balarishisha Rani, 2 Shirley M Kharbuli, 3 Toiaibha Mylliempdah
10m air pistol junior women – 1 Shirley M Kharbuli, 2 Gauri Bharadwaj, 3 Divieja Om Bali
50m prone men – 1 Dennyson Kyrsian, 2 Wanpliborlang Nongsiej, 3 Wallambok Kharkongor
50m prone women – 1 Veronica Buhroy, 2 S Rebecca, 3 Amalisha Sangma
50m free pistol men – 1 Pynkhraw Kharshiing, 2 Walsall M Momin, 3 Mawdaker Marwein
25m centre fire pistol men – 1 Pynkhraw Kharshiing, 2 Davis NR Marak, 3 John TH
25m standard pistol men – 1 Mawdaker Marwein, 2 Pynkhraw Kharshiing, 3 John TH
25m sports pistol women – 1 Balarishisha Rani, 2 Shirley M Kharbuli, 3 Toiaibha Mylliempdah
25m sports pistol junior women – 1 Shirley M Kharbuli, 2 Gauri Bharadwaj, 3 Divieja OM Bali
10m air pistol mixed team – 1 Shirley M Kharbuli and Walsall M Momin, 2 Balarishisha Rani and Maxwell Pyngrope, 3 Toiaibha Mylliempdah and Pynkhraw Kharshiing
10m air rifle mixed team – 1 Anjali Singh and Banrilang Bleine, 2 Rajdeep Ghosh and Toyarisa S Nongrum, 3 Wanpliborlang Nongsiej and S Rebecca
25m standard pistol SAM office bearers match – 1 Jefry Sooting, 2 Neil Sootinck, 3 Lanu Jamir
