Ka khubor wa sñiawsih ha kini ki sngi dawan ko ha ka yung ka sem kamjooh ha ka Ri Jaiñtia heiwa u Sing Mulieh kam uwi na ki MLA kamjooh u Montri warim ka sorkar Meghalaya da ieh syndet u yeini i pyrthai chongwasa ha ka sngi Musiang 10 tarik Naisan 2022.
U Sing Mulieh toh u bru wa imsngi u chakri ya ki kaam paidbah heiwa nadooh u snem 1978 hadooh u snem 1994 dajooh man u kam u MDC kamjooh leh u CEM-JHADC neitæ won ha u snem 1998 wa u snem 2003 da man u kam u MLA ka Jowai Constituency wei hapoh kini ki snem da jied leh wow man u kam u Montri ka sorkar jylla wa toh u pait u yoo ya ka Forest Department, PHE Department wa kiwi kiwi.
U Sing Mulieh hadooh ka sngi wa ieh u yeini i pyrthai chongwasa, hapoh ka Bharatiya Janata Party da ksooh kam u State Secretary yong ka BJP neitæ u Chairman yong ka Manifesto Committee wei man u leh uwi na ki kyrtong yong ka BJP wow yaleh ya ka MLA Election ka wow man ha u snem 2023.
Ya i leh burom khaddooh yow Sing Mulieh da pynman ha ka sngi Pyngkat 12 tarik Naisan deiwa em ka yalang hapyrdi i sakhilang kiwa boon ki paidbah najan najngai ha ka yung bei yong oo ha chnong Ialong heiwa kiwa yahkhmat yong kiwa boon ki seiñ wa kynthup ya ka Meghalaya BJP, Seinraij Ialong, Dong Luti Tuber Ialong, ki Ex-MDC JHADC wa kiwi kiwi dei sñiawkhia da niawtang ki wow kdar u kynmoo ya kiyi kiyi ki kaam kiwa u Sing Mulieh daleh u ha ka dong ka Raij, ka District ka jylla ha ki por kiwa da dep dalai.
