Ha ka tayaw wa dadep da poor iwi i dur yong ka bru wa chah kdoh ha u chrot bordiñ ha Yawchyiap, Jowai heiwa neiliang u Superintendent of Police ka West Jaiñtia Hills, u Bikram D Marak da ong u wa ki pulit da yoh yutip ki yeiwa jia ha i janmiet ka 12 tarik.
Da pyntip u wa da phah ya ki pulit ka Woman Police Station wow takit yeini waroh wei da bood leh ya ka takit katkam ki kyndon ka aiñ.
Chooh chooh da kyntu u leh ya ki paidbah wa lada chem næ tip ki wa jia kamni neini chaphrang emkaam wow pyntip wutwut cha ki pulit wei u dam wow chim ya ka aiñ ha kti.
Kani ka bru da chah kdoh ko hadien wa pynbaad wei da suba toh kawa tooh. Wei neiliang ki pulit ye ki wow phah wan hajir ki ya kiwa emkti ha ini i kaam wow pynchitom ya kani ka bru.
