I oor khyndaw ha ki bynta u sarokbah NH-06 da wanrah i yei sahkut kari nadooh ka 14 tarik ha ki thaaiñ Ratacherra heiwa i pynkhooid yei ktieh, ki moo, ki dieñ wa pat wa oor wa kah ya u sarok kat wow ye ki kari u lai da ye wow pyndep ynnin i sngi ka 16 tarik heipor kamwa 3:00 waje.
Tangwa ynne i step da oor khyndaw biang heipor kamwa 9:30 ha Dona iwa pynbood won sa Ratacherra heipor kamwa 10:30 heiwa da em leh ki dieñ wa pat wow khang biang ya u sarok deiwi.
Ha thaaiñ Narpuh hi, ka yingkieñ wa em ha u sarok khappood ha Shymplong wow lai na Sonapyrdi cha Huroi-Hingaria da tkut noh ko nei joor u slap wei heh ka um wei da sahkut i lai i wan ki paidbah.
Ha West Jaiñtia Hills u sarok Jowai-Amlarem wa dang dep wot wow chah ban hei khyndaw wa oor ha ka sngi Bibar ha ki ar thaw, ynne leh da jia biang i jooh tangwa da ye wow pynkhooid yei khyndaw ha i bynta wa chajan Demthring.
