Ka Refuse Derived Fuel lane ka Waste to Fuel Plant kawa man ka thaw wow pynkylla yei jhep cha u rngaw wa ye u pynemkaam hawa chet wa tu da wan wai ya ka ynne ka sngi ha Tura, West Garo Hills da u Montri Rangbah ka jylla, u Conrad Sangma hei emlang u H.E. Chang Jae-Bok, u Ambassador ka South Korea cha India.
Kani ka Pilot Project namo i pyrchang nyngkong hapyrdi ka sorkar Meghalaya, lyngba ka Tura Municipal Board wa ka Company Chamhana GW kawa na South Korea da rai ya ka ha ka yalang hapyrdi ki heh ka Chamhana Institute of Technology, South Korea wa yahkhmat da u Dongmin Choi, Chairman ha Shillong ha ka 13 tarik u Wisu 2019.
U Montri Rangbah wa ki sahep da pdiang ki ya ini i rukom pynkylla yei jhep hadien i pynsñiawthooh wei da rai wow pynkreh ya ka katkam ka PPP Mode wow chna ya ka jait karkhana wa khian kawa khlem da hap pynlut poisa ka sorkar Meghalaya.
U Conrad da ban joor u wa ini toh i rukom wow bichaar chwa ya i rukom pynkrehkaam chwa wow sdang yeijooh ha kiwi ki sor kam ha Shillong wa kiwi kiwi.
Katkam ka soskular, da rai wow booh chwa ya ki kor wa ye u pynmih 35 MT ha i thaw noh jhep ka Tura wa katni wei daw em leh i esikai ya kiwa kreh da ka Chamhana, ka wow em hok wow pynlai yaw ya i mar (rngaw) wa pynmih yow pynmih poisa ya iwa da pynlut wow pynkrehkaam ko ya kani ka thaw.
Kani ka kreh da toh u sdang ko ha u 2020 tangwa da slem nei wan ka khlam COVID-19 wei da ye u kit ya ki tiar ki tar neibynta kani ka thaw (Plant) da ka jhaad cha India neitæ won cha Tura na sarok ha u Thohlakhmi (Feb) uni u snem.
Kani kawa em ha Tura da booh kam ka nongmuna wow pynsakhiat yei rukom krehkaam (Proof of Concept) wei wow pait yei ye u pdiang yei jhep wa mih na Tura wa kiwi ki thaw.
I rukom pynkylla ka Chamhana ya i jhep cha u rngaw toh deiwa ye u pynmih ya i WASTEF deiwa khleh lang wa kiwi ki jait dawai wa da chna kyrpang wa ye u pynkylla yei jhep cha u rngaw. Ya ki jhep wa py’ut namo Organic Waste (Biomass) wa kiwa ymye de u pynkylla deiwi tawon (Non-Recyclable) kam ki Plastic daw pynemkaam wow chna ya i WASTEF.
Waroh ki jait jhep lait na ki naar, ki yit, ki dieñ, ki moo khyndaw-bilat wa kiwi kiwi daw tylliat ya ki neitæ daw khleh wa i WASTEF kamjooh i dawai wa kyrpang chwa wow pynmih ya ki rngaw kiwa ym sma, kiwa ym mih tdem manda thang.
Ini waroh i rukom pynkylla ya i jhep toh da ki kor bait khlem emkaam ya ki bru wow kreh.
U Conrad Sangma, da ngaitskem u wa ini i kaam daw man iwa jop khnang wow ye u leh yeiwa emkaam neini chaphrang heiyatoh wa i jhep wei ya kam ini daw wanrah leh ha Shillong, Jowai wa kiwi ki thaw ha Meghalaya.
