Hadien wa ujor kawi ka manbei wa tip kam ka Nijanduh Phawa ha Nartiang Police Station wa chah thang i yung ko ha i miet ka 15 tarik uni u bnai, neiliang u Secretary ka Dorbar Chnong Saba, u Andreas Suchiang da pyntip u wa i suba wa ri wei e taro ka Nijanduh Phawa toh nadooh ka 14 Wisu (March) 2022 khamtam hadien wa yoh kjut (khairiñ khlem tip yongbru) ki 6 ngut ki khynnah wei na kini le ngut da phet ki cha yung yong ka deiwa kam wa ki toh ka taro yong ka Nijanduh Phawa.
Da ong u wa kini ki le ngut ki khynnah da khana ki wa nachwa da ri ya ka taro ha yung wei katni won da pynchong ha tre uwi u dieñ uwa em hadien i yung ka Nijanduh Phawa wei neiliang ka Dorbar Chnong da khut ki ya ka Nijanduh Phawa ha ka 19 Naitung (April) wow pynman ya i takit tangwa neiliang ka Nijanduh Phawa da len wei da maham pathan ko ya ki.
U Andreas da ong u wa hadien ini da paan por biang ko wei ka Dorbar Chnong da khut Dorbar ko ha ka 9 Naisan heiwa ha kani ka dorbar ka Nijanduh da kular ko wow pyndep ya ka niam ka rukom da i kñia wei lada kini ki khynnah wa kjut ym chait ki, neiliang yong ka da man ko kawa smat wow mih dei mon yong ka napoh ka chnong. Wei neiliang ki heh ka chnong leh da maham ki ya ki para chnong wymtoh u pynmih iwon iwon i kulmar næ wow tympiah tympra yei yung yong ka.
Da ong u wa ha ka 12 tarik da pyndep ko ya ka niam ka rukom katkam wa da kular wei wot hadien wa pyndep, kini ki 6 ngut ki khynnah ympu em u chait ki.
Hajrong i chah tympiah ki khiandwar ka Nijanduh Phawa ha ka 14 tarik, ha ka sngi wa bood (ha ka 15 tarik) u Naisan da wan hiar ki heh ka kur Phawa wei heini i por kawi na kini ki khynnah (R. Suchiang) da yoh kjut ko deiwa lai phet biang khlem tipbru cha yung yong ka ryngkat i bood ki paidbah nadien. Kani ka khynnah da klam ko ha ka Nijanduh Phawa deiwa ong “Phi kiwa ri wa sumaar ya nga wei katni da lehbeiñ phi ya nga wei da daisarom phi nga”. Wei ya ini da sakhi da ki paidbah wa ki heh ka kur Phawa.
Hadien ini neiliang ka kur Phawa wa ki heh ka chnong da chong yalang ki wow pynbait ya ini i kaam heiwa da rai wa ka Nijanduh Phawa toh u mih ko na ka chnong dei mon sñiawbha khnang wow lait na i awri awra wei manda dep pynkhooid ya ka niam ka rukom wa yatoh wa ka taro ye biang ko wow wan cha chnong wei ka chnong leh da maham ko ya kiwa chong chnong wymtoh u leh ki ya ki kaam wa pyrchah ya ka yung ka Nijanduh Phawa.
Chooh chooh da ong u wa pyn ha ka 15 tarik da chah thang i yung ko wei neiliang ki heh ka chnong da tip ki yeini ha ka 16 tarik wei ki bor chnong da lai pait ki yeini heiwa da sakhi sakhiat wa da chah thang i wei manda takit, ka chnong ym chem ko ya kiwa da leh ya ini i kaam.
Da phylla leh wa ha ka 16 tarik ka Nijanduh Phawa wa u kurim ko, u Nicholas Nartiang da lai ujor noh ki ha ki pulit ha Nartiang Police Station wei ynne ka 17 tarik da pynman biang ya ka yalang paidbah heiwa da rai wow pynche hajrong ini i jia waroh.
