“Nga kat chawa lai O, chwa u lai yow Blai donhi ngooh dem O,” da ong ka Nijanduh Phawa hawa kyntait yeiwa phareb ka Dorbar Chnong Saba wa pynbaad wa ri taro ko, heiwa ha ka 15 tarik da chah thang i yung ko ar tylli kiwa kynthup ya ka yung wa em ka kor dung wa i yung chet.
Heiyatoh wa i chah thang ki yung yong ka, da ong ko wa i daw wa chah thang i toh nei suba wa ri taro wei ka ymtip ko iwon iwon leh hajrong itæ i kaam ri taro.
U kurim ka Nijanduh, u Nicholas Nartiang da khana u wa hadien wa yoh kjut ki khynnah, ki paidbah ka chnong da pynbaad bait ki watoh na ka ksuid ka taro ka yong ki (Nijanduh) wei da phah wow pynchait ya ki khynnah lym kamtæ daw beh noh ya ki. Tangwa kini ki khynnah toh kiwa da yoh kjut nadooh ynnin u snem.
Da pyntip u leh wa hei miet synyaw ka 13 wa 14 tarik da em wa wan siat watur ya ki khon ki kamjooh leh da dat moo ki ya i yung sah yong ki.
Chooh chooh da khana u wa heipor wa man Executive Committee ka chnong u Shirup Suchiang da pam u ya ka khiandwar da ka wait, wei yeini ki dkhot ka Committee da kyntait ki deiwa ong wa ymyoo ki yeitæ.
Wei da khana u leh wa ha i miet ka 15 tarik da chah thang noh i yung chet wa i yung booh kor dung ki.
U Nicholas da pyntip u leh wa ka chnong da khang ko wow lai u wan ka kari ki hapoh ka chnong wei da maham leh wow tympiah ya kani ka kari.
Heiyatoh wa i wan ki heh ka kur Phawa da pyntip u wa da yaklam wow lait na iwon iwon i jia wa sñiawsih i awri awra.
Heiyatoh wa i kam ka chnong wa ka Nijanduh da rai ko wow pyndep ya katæ ka niam ka rukom wow pynkhooid ya ka taro, neiliang yong ka da jubab ko deiwa ong wa, “Nga ymtip O ya katæ, nga tip O du ya u Blai donhi”.
Da pyntip ko leh wa neiliang ka chnong da rai wow phah mih noh ki na chnong ha ka 14 tarik.
Neiliang ka Kur Phawa da kyntu ki ya ka sorkar wow wan e yarap ya kani ka manyung kawa da chah ktah khlem iwon iwon i daw yong ki.
